Արցախի պատգամավորները միջնորդել են փոխել Միքայել Արզումանյանի խափանման միջոցը

Արցախի խորհրդարանի 24 պատգամավորներ դիմել են Հայաստանի Քննչական կոմիտեի ղեկավար Արգիշտի Քյարամյանին՝ Պաշտպանության բանակի նախկին հրամանատար Միքայել Արզումանյանի կալանավորումը որպես խափանման միջոց փոխելու միջնորդությամբ և անձնական երաշխավորություն են հայտնել։

Միջնորդությունը ստորագրած պատգամավորները հայտնել են իրենց պատրաստակամությունը՝ մինչդատական վարույթում հանդես գալու որպես Արզումանյանի պատշաճ վարքագիծն ապահովելու երաշխավորներ։

Գեներալ Արզումանյանի համար անձնական երաշխավորություն է հայտնել նաև Արցախի խորհրդարանի խոսնակ Արթուր Թովմասյանը։

Միքայել Արզումանյանը կալանավորվել էր սեպտեմբերի 1-ին, Արզումանյանին մեղադրանք է առաջադրվել զինվորական պաշտոնեական անփութության հոդվածով՝ Շուշիի պաշտպանության կազմակերպման ընթացքում «անփույթ վերաբերմունք դրսևորելու համար»։ Ավելի ուշ Արզումանյանին նոր մեղադրանք է առաջադրվել պաշտոնեական լիազորություններն անցնելու հատկանիշներով և պատերազմի ժամանակ «Արեգա» բարձունքից զորքերին նահանջի հրաման արձակելու համար։