Հայաստանի նախկին փոխվարչապետ, Երևանի ավագանու 2023-ի ընտրություններին «Քաղաքացիական պայմանագիր» կուսակցության քաղաքապետի թեկնածու Տիգրան Ավինյանն օրերս հանդիպել է Երևանի ավագանու խմբակցությունների հետ՝ քաղաքապետի տեղակալի թեկնածուի կարգավիճակով։ Տեղեկությունը ՍիվիլՆեթի հետ զրույցում հաստատեց «Լույս» խմբակցության անդամ Դավիթ Խաժակյանը։
«Նախատեսվում է, որ Ավինյանի առաջադրման հարցը կմտնի օրակարգ։ Կա պրակտիկա, որ նոր եկող փոխքաղաքապետերը հանդիպում են խմբակցությունների հետ, լավ պրակտիկա է, և նա այդ պրակտիկան պահպանեց։ Հիմնականում ճանաչողական քննարկում էր, թե որ ոլորտներն է նա համակարգելու»,- ասաց Խաժակյանը։ Ակնկալվում է, որ Տիգրան Ավինյանին այդ պաշտոնին առաջադրելու են սեպտեմբերի 13-ին կայանալիք ավագանու նիստին։
Խաժակյանն ասաց, որ փոխքաղաքապետի հարցը որոշվելու է ավագանու քվեարկությամբ։ Նրա փոխանցմամբ՝ 2017-ից սկսած խմբակցությունն ունի գործելաոճ, որ որևէ փոխքաղաքապետի թեկնածության դեմ չի քվեարկում. «Եվ նույնը կպահպանվի այս դեպքում»։
Ավագանու «Իմ քայլը» խմբակցության ղեկավար Արմեն Գալջյանը ևս հաստատեց, որ հանդիպել են Ավինյանի հետ։
«Հանդիպումը եղել է ընդհանուր բնույթի, կոնկրետ նրա թեկնածության վերաբերյալ չի եղել։ Առաջիկա նիստի օրակարգը, կարծում եմ, վաղը կլինի, երբ օրակարգը հրապարակվի, այդ ժամանակ կտեսնեք»,- ասաց Գալջյանը։
