ՀՖՖ-ն և Խոակին Կապառոսը դադարեցնում են համագործակցությունը

Հայաստանի Ֆուտբոլի Ֆեդերացիան և Հայաստանի ազգային հավաքականի գլխավոր մարզիչ Խոակին Կապառոսը երկկողմանի համաձայնությամբ դադարեցնում են համագործակցությունը. իսպանացի մասնագետն այլևս չի գլխավորի Հայաստանի ազգային հավաքականը: Այդ մասին հայտնում է Հայաստանի Ֆուտբոլի Ֆեդերացիան (ՀՖՖ)։

«ՀՖՖ նախագահ Արմեն Մելիքբեկյանը սեպտեմբերի 28-ին հանդիպել է Խոակին Կապառոսի հետ, քննարկել Հայաստանի ազգային հավաքականի այս տարվա ելույթները։ Հանդիպման ընթացքում փոխադարձ համաձայնություն է ձեռք բերվել չշարունակել համագործակցությունը։ Արմեն Մելիքբեկյանը հանդիպման ընթացքում շնորհակալությունն է հայտնել իսպանացի մասնագետին իր աշխատանքի, ՀՀ համար դժվարին օրերին ազգային հավաքականի կողքը մնալու, աշխատանքի ընթացքում մարդկային լավագույն որակներ և բարձր պրոֆեսիոնալիզմ դրսևորելու համար»,- ասված է հաղորդագրությունում։

Խոակին Կապառոսի գլխավորությամբ Հայաստանի ազգային հավաքականն առաջին անգամ իր պատմության ընթացքում հաղթեց պաշտոնական մրցաշարում՝ գրավելով առաջին տեղը Ազգերի Լիգայի C դիվիզիոնի իր խմբում: Իսպանացի մասնագետի գլխավորությամբ Հայաստանի ազգային հավաքականն ունեցավ իր պատմության ամենաերկար անպարտելի շարքը՝ 9 խաղ:

Վերջին մոտ մեկ տարվա ընթացքում, սակայն, Կապարոսի գլխավորությամբ անցկացրած 12 խաղերից 9-ում Հայաստանի հավաքականը պարտվել է: Ընդ որում, Նորվեգիայի հետ այս տարվա մարտին կայացած ընկերական խաղում ազգային ընտրանին կրել է իր պատմության ամենախոշոր հաշվով պարտությունը՝ 9-0: