Գևորգ Թոսունյան
Արտակարգ իրավիճակների նախարարությունը պնդում է, թե իր լիազորությունների շրջանակներում ամեն ինչ արել է՝ կանխելու «Սուրմալու» առևտրի կենտրոնի՝ պայթյունից վնասված շինության փլուզումը։ Սեպտեմբերի 21-ին «Սուրմալու» առևտրի կենտրոնի՝ պայթյունից վնասված շինությունը մասնակի փլուզվեց, ինչի հետևանքով տուժեցին քաղաքացիներ, վնասվեց գույք։
ՍիվիլՆեթը գրավոր հարցում էր ուղարկել ԱԻՆ՝ հասկանալու, թե ում անգործության հետևանքով է փլուզում եղել «Սուլմալու» առևտրի կենտրոնի շենքում։
Արտակարգ իրավիճակների նախարարության պարզաբանմամբ՝ գերատեսչությունը փրկարարական աշխատանքները տեղում ավարտել է 2022-ի օգոստոսի 24-ին։ Այնուհետև ԱԻՆ «Սեյսմիկ պաշտպանության տարածքային ծառայություն» ՊՈԱԿ-ի կողմից իրականացել է տարածքի ու շինության զննություն։ Այն ուղարկվել է Երևանի քաղաքապետարան, Քաղաքաշինության կոմիտե, ՀՀ ոստիկանություն և քննչական կոմիտե։
Զննության արդյունքում պարզվել է, որ պայթյունի հետևանքով փլուզվել են ինչպես հիմնական մասնաշենքի մի հատվածամասի, այնպես էլ երկհարկանի շինության գլխավոր ճակատի կառուցատարրերը:
Նշվել է նաև, որ «Շենքի չփլուզված հատվածամասի կրող կոնստրուկտիվ տարրերը պայթյունի հետևանքով ձևախախտվել են և ենթակա չեն վերականգնման: Արձանագրվել է, որ «Սուրմալու» առևտրի կենտրոնի տարածքում կիսափլուզված մասնաշենքին կից առկա է նաև երկհարկ շինություն, որի գլխավոր ճակատի կրող կոնստրուկտիվ տարրերը մասանակի փլուզված են, և շինության ընդհանուր տեխնիկական վիճակը գնահատվում է վթարային, առկա է ինքնափլուզման վտանգ։
Այս և այլ հանգամանքներ նկատի առնելով՝ ՊՈԱԿ-ն առաջարկել է «Սուրմալու» առևտրի կենտրոնի տարածքում փլուզված և կիսափլուզված շենքերի շուրջը ստեղծել անվտանգության գոտի և արգելել մարդկանց ելումուտը: Ըստ զննության արդյունքների՝ «օգոտոսի 14-ին «Սուրմալու» առևտրի կենտրոնի հիմնական մասնաշենքում տեղի ունեցած պայթյունի հետևանքով վնասված շենքները և շինությունները ենթակա չեն վերականգնման և վերակառուցման, ուստի անվտանգության տեսանկյունից անհրաժեշտ է իրականացնել դրանց ապամոնտաժումը»:
Եռահարկ շինության ապամոնտաժումը խորհուրդ է տրվել իրականացնել նաև պայթեցման եղանակով:
