Հայաստանը համաձայն է աշխատել Ադրբեջանի հետ Ռուսաստանի առաջարկած սկզբունքների հիման վրա, այս մասին Թվիթերի իր էջում գրել է վարչապետ Նիկոլ Փաշինյանը։
«Հայաստանը սեպտեմբերի սկզբին համաձայնություն է տվել Ռուսաստանի ներկայացրած հիմնարար սկզբունքների և պարամետրերի հիման վրա աշխատել Հայաստանի և Ադրբեջանի միջև հարաբերությունների կարգավորման ուղղությամբ, և պատրաստ է դա հաստատել Սոչիում: Հուսով ենք՝ Ռուսաստանը կաջակցի իր առաջարկներին»,- գրել է Փաշինյանը։
#Армения в начале сентября дала согласие работать на основе базовых принципов и параметров установления мжг отношений между Арменией и #Азербайджаном, представленных РФ, и готова подтвердить это в #Сочи. Надеемся, Россия поддержит свои предложения.
— Nikol Pashinyan (@NikolPashinyan) October 28, 2022
ՌԴ նախագահ Վլադիմիր Պուտինը հոկտեմբերի 27-ին Վալդայի համաժողովի շրջանակում հայտարարել էր․ «Մենք չենք պատրաստվում ոչինչ պարտադրել, չենք կարող և չենք պատրաստվում Հայստանին ինչ-որ բան թելադրել, եթե հայ ժողովուրդն ու այսօրվա ղեկավարությունը որոշեն, որ պետք է ընտրել կոնկրետ տարբերակ, ինչքան գիտեմ՝ վաշինգտոնյանը, որը նախատեսում է Ղարաբաղի նկատմամբ Ադրբեջանի ինքնիշխանության ճանաչումը, ապա խնդրեմ, մենք կաջակցենք հայ ժողովրդի ցանկացած ընտրություն։ Եթե հայ ժողովուրդը և Հայաստանի ղեկավարությունը կարծում են, որ Ղարաբաղն ունի իր առանձնահատկությունները, որոնք պետք է հաշվի առնել և ինչ-որ կերպ դա քննարկել ապագա հաշտության պայմանագրում, դա նույնպես հնարավոր է»,- ասել էր Պուտինը։
Ռուսաստանի նախագահը հերթական եռակողմ գագաթնաժողովին մասնակցելու նպատակով Ադրբեջանի նախագահ Իլհամ Ալիևին և Հայաստանի վարչապետ Նիկոլ Փաշինյանին հոկտեմբերի 31-ին հրավիրել է Սոչի։ Նիկոլ Փաշինյանը հաստատել է իր մասնակցությունը։