Ադրբեջանում ԱՄՆ նոր դեսպանը՝ Ռիչարդ Մորնինգսթարը, Բաքու կժամանի օգոստոսի 25-ին: Այս մասին հայտնի է դարձել ԱՄՆ Ջորջթաուն քաղաքում Ադրբեջանա-ամերիկյան առևտրային պալատում նոր դեսպանի պատվին կազմակերպված միջոցառման ընթացքում, հաղորդում է Trend գործակալությունը:
Միջոցառման ընթացքում Մորնինգսթարն անդրադարձել է էներգետիկ անվտանգության և Կասպիական տարածաշրջանում համագործակցության, Լեռնային Ղարաբաղի հակամարտության և մի շարք այլ հարցերի:
Հիշեցնենք, որ ԱՄՆ Սենատը Մորնինգսթարի թեկնածությունը դեսպանի պաշտոնում հաստատել է հունիսի 30-ին:
Ավելի վաղ Մորնինգսթարի թեկնածությանը, որին այս պաշտոնում առաջարկել է ԱՄՆ նախագահ Բարաք Օբաման, հավանություն էր տվել Սենատի արտաքին հարցերի հանձնաժողովը:
ԱՄՆ-ն Ադրբեջանում դեսպան չունի 2011թ. դեկտեմբերից ի վեր, երբ իր դիվանագիտական առաքելություն այս երկրում ավարտել է ԱՄՆ նախկին դեսպան Մեթյու Բրայզան:
