«Մենք Ղարաբաղում բնակվող հայերի հետ պատրաստ ենք խոսել, սակայն ոչ Ռուբեն Վարդանյանի նման մարդկանց հետ»։ Այս մասին հայտարարել է Ադրբեջանի նախագահ Իլհամ Ալիևը՝ նոյեմբերի 17-ին Եվրամիության Արևելյան գործընկերության հարցերով պատվիրակության հետ հանդիպմանը։
«Մենք Ղարաբաղում բնակվող հայերի հետ պատրաստ ենք խոսել, սակայն ո՛չ Մոսկվայի ուղարկած, գրպանում ռուս ժողովորդից գողացված միլիարդներ ունեցող Ռուբեն Վարդանյանի նման մարդկանց հետ: Նա Մոսկվայից այնտեղ է ուղարկվել շատ հստակ օրակարգով»,- նշել է Ալիևը:
Նա եվրոպացի պաշտոնյային հավաստիացրել է, որ Արցախի հայության հետ երկխոսության գործընթացը սկսվել է, և «եթե արտաքին միջամտություններ չլինեին», ըստ Ալիևի՝ գործընթացը կարող էր ավելի դինամիկ հունով ընթանալ:
Ադրբեջանի նախագահը խոսել է նաև խաղաղության պայմանագրի և դրա վերաբերյալ Հայաստանի առաջարկների մասին։
«Այսօր էլ նրանք (Հայաստանը – խմբ․) խաղաղությունից են խոսում, սակայն մենք չենք հասկանում, թե նրանք ինչպե՞ս են խաղաղությունը հասկանում: Դրանով հանդերձ մեր դիրքորոշումը շատ պարզ է»,- ասել է Ալիևը` նկատի ունենալով խաղաղության պայմանագրի հարցում Ադրբեջանի առաջարկած հինգ սկզբունքները:
Ալիևը ոչ միանշանակ և հակասող է համարել Հայաստանից հնչող ազդակները․ «Նրանք ասում են, որ ճանաչում մեր տարածքը (տարածքային ամբողջականությունը – խմբ․) ու ինքնիշխանությունը, այդ թվում Պրահայում և Սոչիում դրա տակ ստորագում են, մենք բոլորս հասկանում ենք, թե ինչ է նշանակում սուվերենություն: Սակայն, միևնույն ժամանակ, նրանք Ադրբեջանում հայ փոքրամասնության հետ կապված հարցերը ցանկանում են արտացոլել խաղաղության պայմանագրում: Դա չի լինելու: Դա անհնար է և մենք թույլ չենք տալու։ Եթե նրանք ցանկանում են Ղարաբաղի հայերի իրավունքների ու անվտանգության մասին խոսել, չի ստացվի»,- ասել է նա:
Իլհամ Ալիևը Հայաստանին կոչ է արել հստակ դիրքորոշում որդեգրել՝ նորից առաջ քաշելով այն թեզը, թե Արցախի շուրջ հարցերը չեն վերաբերում Հայաստանին:
