Ադրբեջանի նախագահ Իլհամ Ալիևը հայտարարել է, որ դեկտեմբերի 7-ին Բրյուսելում Հայաստանի վարչապետ Նիկոլ Փաշինյանի հետ նախատեսված հանդիպումը չի կայանա:
«Բրյուսելում հանդիպումը պետք է կայանար դեկտեմբերի 7-ին։ Բայց երեկ Հիքմեթ Հաջիևը (Ադրբեջանի նախագահի օգնականը – խմբ․) ինձ տեղեկացրեց, որ իր հետ կապ են հաստատել Շառլ Միշելի գրասենյակից և հայտնել, որ Հայաստանի վարչապետ Նիկոլ Փաշինյանը հանդիպմանը համաձայնել է մեկ պայմանով՝ Ֆրանսիայի նախագահ Մակրոնը ևս պետք է մասնակցի բանակցություններին։ Դա նշանակում է, որ այդ հանդիպումը չի կայանա»,- ԱՊԱ գործակալության տեղեկացմամբ այդ մասին նոյեմբերի 25-ին ասել է Ալիևը՝ «Միջին միջանցքի երկայնքով. աշխարհաքաղաքականություն, անվտանգություն և տնտեսություն» համաժողովի ժամանակ։
Ըստ Ադրբեջանի նախագահի՝ Ֆրանսիան չի կարող Բաքվի և Երևանի միջև խաղաղ գործընթացի մաս լինել, քանի որ Մակրոնը Պրահայի հանդիպումից հետո հակաադրբեջանական հայտարարություններ է արել, իսկ Ֆրանսիայի Սենատը Հայաստանին աջակցող բանաձև է ընդունել։ Իլհամ Ալիևի խոսքերն է փոխանցում News.ru կայքը։
Համաժողովին իր ելույթում Ալիևը անդրադարձել է նաև, այսպես կոչված, Զանգեզուրի միջանցքի հարցին․ «Մենք Զանգեզուրի միջանցքի թեման քննարկել ենք ռուս պաշտոնյաների հետ վերջին հանդիպումների ժամանակ։ Չեմ կարծում, որ Հայաստանը կկարողանա արգելափակել միջանցքը։ Ինչ վերաբերում է Իրանին, ապա նա նույնպես չի անի դա, քանի որ հետաքրքրված է տարածաշրջանային կոմունիկացիոն նախագծերով։ Այս նախագծերը ոչ թե ուղղված են որևէ մեկի դեմ, այլ ընդհակառակը, օգուտ կբերեն բոլոր կողմերին»,- նշել է նա, փոխանցում է Turan-ը։
***
Հոկտեմբերի 6-ին Պրահայում տեղի էր ունեցել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը, որին ներկա էին նաև Ֆրանսիայի նախագահ Էմանուել Մակրոնը և Եվրոպական խորհրդի նախագահ Շառլ Միշելը։ Մինչ այդ Բրյուսելում Փաշինյան-Ալիև-Միշել եռակողմ ձևաչափով չորս հանդիպում էր կայացել։
