«Քաղաքացիական պայմանագիր» խմբակցությունը Ալավերդի միավորված համայնքի ավագանու 5 նիստերից 3-ը բոյկոտել է։ Խմբակցության քարտուղար Հարություն Ձավարյանի խոսքով՝ իրենց բոյկոտը ոչ թե քաղաքական, այլ մարդկային բովանդակություն է ունեցել:
ՔՊ խմբակցությունը բոյկոտել է հոկտեմբերի 12-ի ավագանու առաջին նիստը, որի ընթացքում Ալավերդի միավորված համայնքի ղեկավար է ընտրվել «Ապրելու երկիր» կուսակցությունը ներկայացնող Արկադի Թամազյանը: Նույն պատճառով ՔՊ խմբակցությունը բոյկոտել է նաև ավագանու երկրորդ՝ հոկտեմբերի 15-ի նիստի՝ համայնքապետի երդման արարողությունը:
Ավագանու առաջին երկու նիստերի բոյկոտից հետո իշխանական թևի խմբակցությունը հոկտեմբերի 31-ի հերթական նիստին օրակարգային 14 հարցերի որոշումներին միաձայն կողմ է քվեարկել: Այս նիստին նրանք համայնքապետին խնդրել են նոյեմբերի11-ին ավագանու հերթական նիստ չնշանակել՝ խմբակցության որոշ անդամների զբաղվածության պատճառով:
Համայնքապետը հերթական նիստը նշանակել է նոյեմբերի 22-ին, սակայն նոյեմբերի 8-ին նախաձեռնել, իսկ նոյեմբերի11-ի հրավիրել է ավագանու արտահերթ նիստ, որին ՔՊ խմբակցությունից ներկայացել են ավագանու 7 անդամներ, սակայն նիստին մասնակցելու համար չեն գրանցվել:
Նոյեմբերի 11-ի արտահերթ նիստը ՔՊ խմբակցության երրորդ բոյկոտն էր: Նիստում քննարկվել է համայնքապետի վարձատրության չափը, համայնքի կազմում ընդգրկված 500-ից պակաս հաշվառված բնակիչներ ունեցող բնակավայրերում վարչական ղեկավարներ ունենալու, համայնքապետարանի աշխատակազմի կառուցվածքն ու աշխատակիցների թվաքանակը, հաստիքացուցակը և պաշտոնյաների դրույքաչափերը, ՀԱԿ-ի անդամ Տիգրան Պապոյանին համայնքի ղեկավարի 1-ին տեղակալ նշանակելու և հողամասերի նպատակային ու գործառնական նշանակությունների փոփոխություն կատարելու հարցերը:
Ավագանու կանոնակարգի խախտում՝ արտահերթ նիստ հրավիրելիս
Արտահերթ նիստն սկսելուց առաջ ՔՊ խմբակցությունը Հարություն Ձավարյանի բերանով դժգոհել է համայնքապետի կողմից արտահերթ նիստ նախաձեռնելիս իրենց հետ գործընկերային պայմանավորվածության խախտումից։ Խմբակցության անդամները նաև նկատել են, որ արտահերթ նիստը հրավիրվել է ավագանու կանոնակարգի 133 և 134 կետերի խախտումներով: Դրա հետևանքով համայնքապետարանից արտահերթ նիստի օրակարգը, որոշման նախագծերը և մյուս փաստաթղթերը ավագանու անդամներին ուղարկվել են ոչ թե հոկտեմբերի 8-ին՝ արտահերթ նիստը նախաձեռնելու հաջորդ 24 ժամվա ընթացքում, այլ արտահերթ նիստից 24 ժամ առաջ:
«Հնարավոր է, որ արտահերթ նիստը «Ապրելու երկիր» խմբակցությունը և համայնքապետ Արկադի Թամազյանը ցանկացել են առանց մեր խմբակցության անցկացնել: Թեմաներ են եղել դրանց հետ կապված: Մեզ այդ նիստից հետաքրքրել են համայնքապետարանի աշխատակազմի կառուցվածքն ու աշխատակիցների թվաքանակը, հաստիքացուցակը և պաշտոնյաների դրույքաչափերի մասին օրակարգային հարցերը: Մենք այստեղ միտում ենք տեսել»,- ասում է Ձավարյանը: Վերջինը նոյեմբերի 11-ին Արկադի Թամազյանին առաջարկել է չեղարկել արտահերթ նիստը, այն նշանակել այլ օր և նախապես համաձայնեցնել ՔՊ խմբակցության հետ, այլապես նրանց կողմից արտահերթ նիստին կայացված բոլոր որոշումները կբողոքարկվեն և կկասեցվեն դատական կարգով: Առաջարկը չի ընդունվել: Հայտարարությունից հետո ավագանու ՔՊ խմբակցության յոթ անդամները բոյկոտել են արտահերթ նիստը:
Մեկնաբանում է համայնքի ղեկավարը
Արկադի Թամազյանը Սիվիլնեթին պարզաբանեց, թե արտահերթ նիստը երբ էլ հրավիրվեր՝ ավագանու մի քանի անդամների հարմար չէր լինելու: Թամազյանը նշեց, որ խմբակցության՝ նոյեմբերի 11-ին նիստ չնշանակելու առաջարկը վերաբերել է ավագանու հերթական նիստին, որին ինքը համաձայնել է:
Նոյեմբերի 14-ին նիստ հրավիրելու իր առաջարկին դեմ է կանգնել ՔՊ խմբակցության ավագանու մեկ այլ անդամ: Արկադի Թամազյանը պնդում է, որ հերթական նիստի օրվա համաձայնությունից հետո ավագանու բոլոր անդամներին հայտարարել է, որ մոտակա օրերին արտահերթ նիստ է հրավիրվելու: «Ի վերջո, մենք պարտավոր չենք ավագանու նիստերի հերթական օրերը համաձայնեցնել ավագանու անդամների հետ»,- ասում է նա:
ՍիվիլՆեթի հարցերին պատասխանեց նաև ավագանու «Քաղաքացիական պայմանագիր» խմբակցության քարտուղար Հարություն Ձավարյանը։
– Սեպտեմբերի 25-ից հետո Ալավերդի համայնքում ավագանու հրավիրված 5 նիստերից 3-ը ձեր խմբակցությունը բոյկոտել է: Ինչո՞ւ:
– Չեմ մեկնաբանելու մեր կողմից առաջին երկու՝ հոկտեմբերի 12-ի և 15-ի ավագանու նիստերը բոյկոտելու պատճառները: Ինչ վերաբերում է նոյեմբերի 11-ի արտահերթ նիստի բոյկոտին՝ դրա մասին լիքը ասելիք ունենք: Մենք համայնքապետ Արկադի Թամազյանի հետ նախօրոք պայմանավորվածություն ենք ունեցել, որ նոյեմբերի 11-ին ավագանու նիստ չհրավիրվի: Պայմանավորվածությունը խախտվել է:
– Ձեր խմբակցությունը իր հայտարարությամբ որոշել է նոյեմբերի11-ի արտահերթ նիստը բողոքարկել դատարանում, բայց չբողոքարկեցիք:
-Համենայնդեպս, վերջին՝ նոյեմբերի 22-ին նիստի օրակարգերին մենք պետք է դեմ քվեարկեինք, բայց Արկադի Թամազյանի կառուցողական մոտեցումը մեր խմբակցությանը դուր եկավ, և նիստին մենք էլ մաքսիմում կառուցողական մոտեցանք: Համայնքապետն իր հայտարարություններով և ընդունած որոշումներով մեզ ընդառաջ եկավ:
– Ո՞ր հարցերում։
– Մեր առաջարկությամբ մի քանի որոշումներում, այդ թվում նաև՝ Ալավերդի համայնքի 2023թ. տեղական տուրքերի և վճարների դրույքաչափերում նախադպրոցական ուսումնական հաստատությունների մասով իրենց խմբակցության կողմից սահմանված 5 հազար դրամ վճարը դարձավ 3,5 հազար դրամա: Գյուղատնտեսական աշխատանքների համար նախատեսված տեխնիկայի օգտագործման վարձավճարները էժանացան, այս ցանկում էքսկավատորների վճարների հետ կապված փոփոխություններ եղան,տեղի ունեցան մի քանի դրույքաչափերի այլ փոփոխություններ: Բայց մեզ հետ եկան այդ համաձայնության, որը մեր կողմից ողջունելի էր: Ինչ վերաբերում է մեր բոյկոտին, այն քաղաքական բովանդակություն չի ունեցել: Ընդհանրապես այն ավելի շատ մարդկային բովանդակություն է ունեցել:
– Այդ դեպքում ինչո՞ւ էիք լքում ավագանու նիստերը, հնարավոր չէ՞ր սկզբից Ձեր ասած մարդկային քննարկումերին գնալ:
– Եթե մենք այսօր պայմանավորվածություն ենք ձեռք բերում, որը խախտվում է, և ասում ենք կա օրենքի անհամապատասխանություն, որն անտեսվում է, դրանից հետո, կներեք, ավագանու նիստին մեր մասնակցությունը ճիշտ չէր լինի: Գիտեք, եթե մենք անգամ պարտվել ենք ՏԻՄ ընտրություններում, դա չի նշանակում, թե պարտված ուժ ենք և մեզ հետ չպետք է հաշվի նստել: Բայց մենք մեծ ուժ ենք։
Լարիսա Փարեմուզյան, Ալավերդի
