Դեկտեմբերի 1-ին ԵԱՀԿ նախարարական 29-րդ համաժողովի շրջանակներում Հայաստանի արտաքին գործերի նախարար Արարատ Միրզոյանը հանդիպել է ԵՄ արտաքին գործերի ու անվտանգության քաղաքականության հարցերով Բարձր ներկայացուցիչ Ժոզեպ Բորելին, հայտնում է ՀՀ ԱԳՆ-ն։
Հանդիպմանը Միրզոյանն ու Բորելն անդրադարձել են տարածաշրջանային կայունության և անվտանգության հարցերին։ Զրուցակիցները կարևորել են ԵՄ դիտորդական առաքելության տեղակայումը Հայաստանում և քննարկել դրա գործունեությանը վերաբերող հարցեր:
«Միրզոյանն ընդգծել է Հարավային Կովկասում խաղաղություն հաստատելու հայկական կողմի հանձնառությունը և բարձր գնահատել այս ուղղությամբ ԵՄ աջակցությունը: Նախարարը շեշտել է, որ Ադրբեջանի ոչ կառուցողական դիրքորոշումն ու առավելապաշտական նկրտումները խոչընդոտում են խաղաղության հասնելու նպատակով գործադրվող ջանքերին և նպաստում էսկալացիայի հավանականության բարձրացմանը: Շեշտվել է ՀՀ ինքնիշխան տարածքի նկատմամբ ադրբեջանական ագրեսիաների հետևանքների վերացման անհրաժեշտությունը»,- ասված է հաղորդագրությունում։
Նույն օրը ԵՄ արտաքին գործերի ու անվտանգության քաղաքականության հարցերով Բարձր ներկայացուցիչը հանդիպել է նաև Ադրբեջանի ԱԳ նախարար Ջեյհուն Բայրամովին։ Ժոզեպ Բորելը Թվիթերի իր էջում գրել է, որ Բայրամովի հետ քննարկել են տարածաշրջանային մարտահրավերները։
Բորելն ընդգծել է ԵՄ հանձնառությունը՝ նպաստելու Հարավային Կովկասում խաղաղության շուրջ բանակցություններին և վստահության ամրապնդմանը։
Ակնկալելով Ադրբեջանի համագործակցությունը՝ շարունակելու ջանքերը խաղաղության կառուցման և տարածաշրջանային բարգավաճման ուղղությամբ:
Discussed regional challenges with Azerbaijan’s FM @Bayramov_Jeyhun. Underscored EU’s commitment to facilitate peace talks and confidence building in the South Caucasus. Counting on Azerbaijan’s cooperation to continue efforts towards peace building and regional prosperity. pic.twitter.com/SojQlytMoV
— Josep Borrell Fontelles (@JosepBorrellF) December 1, 2022