Հարավային Կովկասի տարածաշրջանի «3+3» ձևաչափով նոր հանդիպում է նախապատրաստվում, այժմ համաձայնեցվում են ժամկետներն ու օրակարգը։ Այս մասին դեկտեմբերի 5-ին Մոսկվայում Ադրբեջանի ԱԳ նախարարի հետ հանդիպմանը հետևած մամուլի ասուլիսի ժամանակ հայտարարել է ՌԴ արտգործնախարար Սերգեյ Լավրովը, փոխանցում է ՏԱՍՍ-ը։
«Մենք խոսել ենք նաև տարածաշրջանային խորհրդատվական հարթակի գործունեության մասին, նկատի ունեմ հարավկովկասյան երեք հանրապետությունները և նրանց երեք հարևանները՝ Ռուսաստանը, Իրանը, Թուրքիան։ Դա ժամանակին Ադրբեջանի նախագահի նախաձեռնությունն էր, տեղի ունեցավ առաջին հանդիպումը։ Այժմ մենք պատրաստվում ենք հերթական նման միջոցառմանը, համաձայնեցնում ենք ժամկետներն ու օրակարգը»,- ասել է նա։
2021-ի դեկտեմբերի 10-ին Մոսկվայում կայացել էր 3+3 կամ 3+2 ձևաչափով նախանիստ, որին Հայաստանը մասնակցել էր արտաքին գործերի նախարարի տեղակալի կարգավիճակով։
***
2020-ի ղարաբաղյան պատերազմի ավարտից հետո տարածաշրջանի վեց երկրների մասնակցությամբ համագործակցության հարթակ ստեղծելու գաղափարով հանդես է եկել Թուրքիան։ Այդ երկրի նախագահ Ռեջեփ Թայիփ Էրդողանը Բաքվում 2020-ի դեկտեմբերի 11-ին հայտարարել էր «Վեցի հարթակ» ստեղծելու մասին։
Ներկայում գործընթացում ակտիվորեն ներգրավված է Ռուսաստանը։ Մոսկվան հայտարարել է, որ «եկել է ժամանակը ձևաչափը գործնական հուն մտցնելու համար»։
