Արցախի պետնախարար Ռուբեն Վարդանյանն Արցախի հանրային հեռուստատեսության հետ զրույցում ասել է, որ իր պաշտոնավարման 36 օրում շատ կարևոր գործեր են արվել, որոնք այդքան էլ չեն երևում, «այդ 36 օրը թույլ է տվել հասկանալ, թե ինչ վիճակում է Արցախի հասարակությունն ու տնտեսությունը»:
Ըստ Վարդանյանի՝ մի քանի ուղղությամբ արդեն սկսվել են փոփոխությունները. «Հավատացե՛ք ինձ՝ կան մի շերտ մարդիկ, որոնք ունևոր են և տարբեր հարաբերություններ են ունեցել կառավարության հետ։ Նրանք արդեն զգացել են, թե ինչ է փոխվել: Հասարակ մարդը, կարող է, չի զգացել փոփոխությունները, հարուստը կամ ունևորը արդեն լավ զգացել են տարբերությունը, որովհետև մենք մտցրել ենք շատ հստակ և կտրուկ պայմաններ»:
Խոսելով փոփոխությունների մասին՝ նա ասաց, որ դրանք ցավալի ռեակցիա են բերելու։ «Ցավալի է լինելու էլիտայի մարդկանց համար, որոնց հնարավորոթյունները ավելի շատ են։ Ընդհանուր միջավայրը հասարակության մեջ ստեղծել է շատ հիվանդ իրավիճակ. ունևորները ընդհանուր ծրարգրերից օգտվում են ավելի շատ, քան հասարակ մարդիկ, և դա անընդունելի է ինձ համար»։
Լրագրողի հարցին, թե կան արդյոք պաշտոնները բաշխելու վերաբերյալ պայմանավորվածություններ քաղաքական ուժերի հետ, Վարդանյանը պատասխանեց՝ չկան, և շնորհակալ է Արցախի նախագահին փոփոխությունների հարցում իրեն հարյուր տոկոսանոց մանդատ տրամադրելու համար:
Ինչ վերաբերում է պետական կառավարման արդյունավետությանը՝ նա ասաց, որ դա ևս լուրջ խնդիր է. «Մի կողմից մենք ունենք պահանջ և հաստիքները չենք կարողանում լրացնել բիզնեսում և պետական համակարգում, մյուս կողմից ունենք շատ մարդիկ, որոնք ոչ արդյունավետ են աշխատում: Դրա պատճառը պատերազմն է, պատերազմի հետևանքներն են: Մենք ունենք մարդիկ, որոնք իսկապես ուզում են փոխվել, մենք ունենք մարդիկ, որոնք պատրաստ չեն փոխվել և վստահ են, որ պետությունն ամեն ինչով իրենց պիտի ապահովի: Ուղղակի կրճատելով ոչինչ չի ստացվի: Մենք պետք է այդ մարդկանց համար վերապատրաստվելու պայմաններ ստեղծենք և երիտասարդներին էլ հնարավորություն տանք: Մենք ունենք տեղեր, որ ընդհանրապես մասնագետ չունենք, տեղեր ունենք, որ շատ-շատ են: Դրա համար շատ տարբեր է իրականությունը, հեշտ որոշում չի լինելու: Այդ որոշումը մարդկանց ցավ է պատճառելու, բայց ամեն ինչ անելու ենք, որ այդ ցավը փափկացնենք, որովեհտև մարդիկ, որոնք ապրում են Արցախում, արժանի են հարգանքի և օգնության»:
Շուտով կընդունվի Արցախի 2023 թվականի բյուջեի նախագիծը։ Վարդանյանն ավելի վաղ խոստացել էր, որ կլինի նոր ծրագրային բյուջե: «Ի՞նչն է փոխվելու» հարցին Վարդանյանը պատասխանեց, որ այն պետք է լինի պրոյեկտային. «Ոչ թե ուղղակի փող բաժանենք, այլ փող ծախսելուց հասկանանք, թե ինչ արդյունքներ ենք ստանալու: Արդյունքները պետք է դրվեն մինչև պրոյեկտ սկսելը, ոչ թե վերջում»:
