«Լաչինի միջանցքի շուրջ զարգացումները Հայաստանի համար անկեղծության փորձություն են»,- դեկտեմբերի 29-ին հայտարարել է Թուրքիայի արտաքին գործերի նախարար Մևլութ Չավուշօղլուն՝ 2022-ի ամփոփիչ մամուլի ասուլիսին:
Նա նկատի ունենալով Կաշենի հանքավայրի շուրջ ստեղծված իրավիճակը՝ ասել է․ «Անընդունելի են Ադրբեջանի տարածքներում հարստությունների շահագործման աշխատանքները»:
Թուրքիայի արտաքին քաղաքական գերատեսչության ղեկավարի համոզմամբ՝ իրենք Ադրբեջանի հետ սերտ համագործակցությամբ շարունակում են համապատասխանեցնել Հայաստանի հետ հարաբերությունների կարգավորման գործընթացը․ «Ադրբեջանի հետ մեր հարաբերությունները ամենաբարձր մակարդակում են»,- շեշտել է թուրք պաշտոնյան:
Ադրբեջանը 18-րդ օրն է ինչ փակ է պահում Լաչինի միջանցքը՝ հումանիտար ճգնաժամ ստեղծելով Արցախում: Պաշտոնական Ադրբեջանը հանդես է գալիս Կաշենի հանքավայրում մշտադիտարկում անելու և դրա աշխատանքները դադարեցնելու պահանջով։
