Ադրբեջանի կողմից Լաչինի միջանցքի փակման ամենաիրական պատճառն այն է, որ Լեռնային Ղարաբաղի հայերը շարունակում են ապրել իրենց հայրենիքում։ Կառավարության հունվարի 5-ի նիստի մեկնարկին հայտարարեց վարչապետ Նիկոլ Փաշինյանը։
Նրա խոսքով՝ Լաչինի միջանցքը ապօրինի փակումը շարունակվում է արդեն 25 օր՝ հարուցելով հումանիտար խնդիրներ Արցախի բնակչության համար։
«Մենք ավելի առարկայական քայլեր ենք ակնկալում միջազգային հանրությունից ու մասնավորապես ՌԴ խաղաղապահ զորախմբից, որը տեղակայված է ԼՂ-ում ու Լաչինի միջանցքը վերահսկողության տակ պահելը նրա ուղիղ պարտավորությունն է»,- հայտարարեց Նիկոլ Փաշինյանը։
Վարչապետը կարևորեց նաև Լաչինի միջանցք միջազգային փաստահավաք առաքելության գործուղումը։
***
Դեկտեմբերի 12-ին` ժամը 10:30-ին, մի խումբ ադրբեջանցիներ փակել են Ստեփանակերտ-Գորիս մայրուղին։ Ադրբեջանցի «բնապահպան-ակտիվիստները» «բողոքում են ռուս խաղաղապահների ժամանակավոր վերահսկողության տակ գտնվող տարածքում հանքավայրերի ապօրինի շահագործման դեմ»։ Արդեն 25-րդ օրն է՝ Ադրբեջանը շարունակում է արգելափակված պահել Արցախը Հայաստանին միացնող միակ ճանապարհը։
