Կառավարությունը մոտ 115 միլիոն դրամ կհատկացնի Լաչինի միջանցքի փակման հետևանքով Սյունիքի ու Երևաի հյուրանոցներում ապաստանած արցախցիների ծախսերի փոխհատուցման համար։ Համապատասխան որոշման նախագիծն ընդգրկված է կառավարության հունվարի 12-ի նիստի օրակարգում։
Ըստ որոշման հիմնավորման՝ դեկտեմբերի 12-ից սկսած Երևան քաղաքի և Գորիս համայնքի 17 հյուրանոցներում հյուրընկալվել է շուրջ 506 քաղաքացի։ 96 միլիոն դրամը կառավարությունը կհատկացնի Սյունիքի մարզպետարանին՝ հյուրանոցների ծախսերի փոխհատուցման համար, իսկ 18 միլիոնը՝ Երևանի քաղաքապետարանին։
***
Դեկտեմբերի 12-ին` ժամը 10:30-ին, մի խումբ ադրբեջանցիներ փակել են Ստեփանակերտ-Գորիս մայրուղին։ Ադրբեջանցի «բնապահպան-ակտիվիստները» «բողոքում են ռուս խաղաղապահների ժամանակավոր վերահսկողության տակ գտնվող տարածքում հանքավայրերի ապօրինի շահագործման դեմ»։ Արդեն մեկ ամիս է՝ Ադրբեջանը շարունակում է արգելափակված պահել Արցախը Հայաստանին միացնող միակ ճանապարհը։