Երուսաղեմի Հայոց Նուրհան արքեպիսկոպոս Մանուկյանի որոշմամբ՝ Սուրբ աթոռի կալվածքների տեսուչ է նշանակվել Պատրիարքության դիվանապետ Կորյուն վարդապետ Բաղդասարյանը, հայտնում է Երուսաղեմի Սրբոց Հակոբյանց Միաբանությունն իր ֆեյսբուքյան էջում։
«Նորին Ամենապատուություն Տ. Նուրհան Արք․ Մանուկեան Պատրիարք Սրբազան Հօր տնօրինութեամբ Հոգեշնորհ Տ. Պարետ Ծ. Վարդապետ Երէցեան ազատուած է Սուրբ Աթոռոյս Կալուածոց տեսչի պաշտօնէն:Սուրբ Աթոռոյս Կալուածոց նոր տեսուչ նշանակուած է Հոգեշնորհ Տ. Կորիւն Վարդապետ Բաղդասարեան»,- ասված է հաղորդագրությունում։
Պարետ վարդապետ Երիցյանի անունը կապվում է Հայոց պատրիարքարանի կողմից «Կովերի պարտեզ» կալվածքը վարձակալության հանձնելու աղմկահարույց հարցի հետ, որը դժգոհության մեծ ալիք էր բարձրացրել։ 2021-ի տարեվերջին խնդիրը մեծապես լուսաբանվեց մամուլում այն բանից հետո, երբ Երուսաղեմի Սրբոց Հակոբյանց Միաբանության անդամները հայտարարություն տարածեցին՝ մտահոգություն հայտնելով «Կովերի պարտեզ» տարածքի վարձակալության առնչությամբ։ Մեկ այլ հայտարարությամբ նրանք պահանջեցին պատրիարքից չեղյալ հայտարարել «Կովերի պարտեզի» համաձայնագիրը։
