Արցախում ներքաղաքական ճգնաժամ չկա ու չի կարելի նման բան թույլ տալ։ Միայն շրջափակման հարուցած ճգնաժամի հաղթահարումից հետո հնարավոր կլինի անդրադառնալ ներքաղաքական հիմնախնդիրների լուծմանը։ Այս մասին հունվարի 16-ին Արցախի Ազգային ժողովում պատգամավորների հետ հանդիպմանը հայտարարել է Արցախի նախագահ Արայիկ Հարությունյանը։
Նախագահի աշխատակազմի հաղորդագրության համաձայն՝ Հարությունյանը շրջափակման հետևանքների, ներքին և արտաքին մարտահրավերներին դիմագրավելուն ուղղված քայլերի մասին: Արցախի նախագահը կարևորել է ներքին միասնականության պահպանումը՝ այդ գործում ընդգծելով խորհրդարանական ուժերի կողմից իրականացվող աշխատանքը:
«Անդրադառնալով վերջին օրերին մամուլում և սոցիալական ցանցերում Արցախի ներքաղաքական կյանքի վերաբերյալ բուռն քննարկումներին՝ նախագահը նշել է, որ զերծ կմնա եղած շահարկումները մեկնաբանելուց, ընդամենը կարող է հստակ ասել, որ Արցախում ներքաղաքական ճգնաժամ չկա ու չի կարելի նման բան թույլ տալ, քանի որ կա հստակ գիտակցում, որ մեր հիմնական օրակարգը ծագած հրատապ խնդիրները հաղթահարելն է ու Արցախն այս իրավիճակից դուրս բերելը: Այդ համատեքստում նա շեշտադրել է, որ միայն շրջափակման հարուցած ճգնաժամի հաղթահարումից հետո հնարավոր կլինի անդրադառնալ ներքաղաքական հիմնախնդիրների համակարգային լուծման հարցերին»,- ասված է հաղորդագրությունում։
***
Հունվարի 14-ին լուրեր տարածվեցին, որ Արցախի պետնախարար Ռուբեն Վարդանյանը ազատվելու է պաշտոնից։ Վարդանյանը, սակայն, հայտարարեց, որ չի պատրաստվում հրաժարական տալ։ Նույն օրն ավելի վաղ Արցախի Ազգային ժողովի նախագահ Արթուր Թովմասյանը անսպասելիորեն խոսել էր նախագահական և խորհրդարանական արտահերթ ընտրությունների մասին՝ չբացառելով, որ ինքը ևս կարող է առաջադրվել նախագահական ընտրություններում։
Արցախի նախագահ Արայիկ Հարությունյանը նոյեմբերի 23-ին անակնկալ հետ էր կանչել սահմանադրական փոփոխությունների նախագիծը, որն անցել էր հաստատման բոլոր փուլերը և պետք է դրվեր հանրաքվեի։ Սահմանադրական բարեփոխումներով Արցախում խորհրդարանական և նախագահական ընտրություններն անցկացվելու էին առանձին՝ համապատասխանաբար 2023 և 2024 թվականներին: Սահմանադրության փոփոխությամբ՝ նախատեսվում էր նախագահական համակարգից անցում կատարել կառավարման կիսանախագահական համակարգի՝ վերականգնելով վարչապետի ինստիտուտը:
Ռուբեն Վարդանյանը Արցախի պետական նախարար է նշանակվել նոյեմբերի 4-ին՝ այդ պաշտոնում փոխարինելով Արտակ Բեգլարյանին։ Ռուբեն Վարդանյանը ստացել է լայն լիազորություններ, նախագահի հրամանագրով նրա անմիջական ենթակայության տակ է անցել ինը նախարարություն, մինչդեռ նախորդ պետնախարարի անմիջական ենթակայության տակ ընդամենը երեք նախարարություն էր։
