Հայաստանը Ադրբեջանին է ներկայացրել խաղաղության պայմանագրի խմբագրված առաջարկներ, որոնց մեկ ամիս է՝ Ադրբեջանը չի պատասխանել։ Կառավարության հետ խորհրդարանում կայացած հարցուպատասխանի ժամանակ հայտարարեց արտաքին գործերի նախարար Արարատ Միրզոյանը։
«Նախագծի շուրջ լինում են ադրբեջանական, հետո հայկական, հետո էլի ադրբեջանական առաջարկներ, մինչ այն պահը, երբ վերջնական համաձայնեցված տեքստ կլինի։ Մենք հերթական մեր առաջարկներն ու դրան կից հիմնավորումներն ուղարկել ենք ադրբեջանական կողմին։ Մեկ ամիս է, որ որևէ արձագանք չունենք»,- ասաց Արարատ Միրզոյանը։
ԱԳՆ ղեկավարը վստահեցրեց՝ թյուր են այն պատկերացումները, թե հայկական կողմն արգելակում է կամ ոչ կառուցողական է խաղաղության համաձայնագրի տեքստի աշխատանքներում։ Հակառակը՝ Ադրբեջանն է դադարեցրել բուն խաղաղության տեքստի քննարկումները և զուգահեռաբար դիմել սադրիչ գործողությունների։
Խաղաղության համաձայնագրի տեքստը, ըստ Միրզոյանի, պիտի քննարկվեր նաև անցյալ ամիս Մոսկվայում Ադրբեջանի ու Ռուսաստանի արտգործնախարարների հետ, սակայն Լաչինի միջանցքի ապօրինի փակումը հայկական կողմին թույլ չի տվել մասնակցել այդ հանդիպմանը։
