Ադրբեջանի արտաքին գործերի նախարար Ջեյհուն Բայրամովը հայտարարել է, որ իրենք պատրաստ են ամենամոտ ժամկետում Հայաստանի հետ հանդիպմանը։
Նա նշել է, որ խաղաղության պայմանագրի վերաբերյալ քննարկումը պետք է շարունակվեր դեկտեմբերի 23-ին Մոսկվայում նախատեսված եռակողմ հանդիպմանը, սակայն հայկական կողմը չէր ներկայացել դրան։
«Վերջին օրերին Հայաստանը մանիպուլյացիաների դիմում՝ նշելով, թե գնդակը ադրբեջանական կողմում է (նկատի ունի խաղաղության պայմանագրի հայկական առաջարկներին չպատասխանելու ՀՀ ԱԳ նախարար Արարատ Միրզոյանի հայտարարությունը – խմբ․)։ Հայաստանը դանդաղեցնում է գործընթացը և դա նրա ոչ լուրջ քայլերի վկայությունն է։ Մենք հայտարարել ենք, որ Ադրբեջանը պատրաստ է հինգ սկզբունքների հիման վրա աշխատել փաստաթղթի տեքստի մշակման ուղղությամբ, մենք պատրաստ ենք կարճ ժամանակում հերթական հանդիպմանը»,- լրագրողների հետ ճեպազրույցում ասել է Բայրամովը։
Ադրբեջանի ԱԳ նախարարն ակնկալում է, որ Հայաստանը կհամաձայնի նոր հանդիպմանը մասնակցել, ոչ թե «խնդիրներ կստեղծի գործընթացում»։
***
Դեկտեմբերի 23-ին Մոսկվայում նախատեսված էր Հայաստանի, Ռուսաստանի և Ադրբեջանի արտաքին գործերի նախարարների հանդիպումը, սակայն հայկական կողմը խնդրել էր հետաձգել այն՝ հաշվի առնելով Լաչինի միջանցքում ստեղծված իրավիճակը։
Դեկտեմբերի 12-ին` ժամը 10:30-ին, մի խումբ ադրբեջանցիներ փակել են Ստեփանակերտ-Գորիս մայրուղին։ Ադրբեջանցի «բնապահպան-ակտիվիստները» «բողոքում են ռուս խաղաղապահների ժամանակավոր վերահսկողության տակ գտնվող տարածքում հանքավայրերի ապօրինի շահագործման դեմ»։ Արդեն 11-րդ օրն է՝ Ադրբեջանը շարունակում է արգելափակված պահել Արցախը Հայաստանին միացնող միակ ճանապարհը։
