Իսմի Աղաև, OC Media
Նախիջևանի քրեակատարողական ծառայության պետը ինքնավար հանրապետության վերջին բարձրաստիճան գործիչն է, որը կալանավորվել է յուրացման և կաշառակերության մեղադրանքով:
Բաքվի դատարանը հունվարի 27-ին Թոֆիգ Հասանովի նկատմամբ խափանման միջոց է կիրառել չորս ամսվա նախնական կալանքը: Հասանովին կարող է սպառնալ մինչև 12 տարվա ազատազրկում, եթե նրա մեղքն ապացուցվի։
Նրան մեղսագրվող հափշտակության կամ կաշառքի չափերի մասին մանրամասներ չեն հաղորդվում։
Հասանովի ձերբակալությունը վերջինն է Նախիջևանում ադրբեջանական իշխանությունների ակնհայտ բռնաճնշումների շարքում, ինչը խորացնում է ենթադրությունները, որ Բաքուն կարող է փորձել բարձր ինքնավարություն ունեցող էքսկլավն առնել իր անմիջական վերահսկողության տակ:
Անցյալ տարեվերջին մի քանի բարձրաստիճան պաշտոնյա ձերբակալվեց, այդ թվում՝ ինքնավար հանրապետության ֆինանսների նախարար Ռաֆայել Ալիևը, նույնպես յուրացման մեղադրանքով:
Վասիֆ Թալիբովը, որը 27 տարի ղեկավարել էր Նախիջևանը որպես ինքնավար հանրապետության Գերագույն ժողովի նախագահ, նույնպես հրաժարական է տվել բարձրաստիճան այս ձերբակալություններից անմիջապես հետո:
Դեկտեմբերի 22-ին Ադրբեջանի նախագահ Իլհամ Ալիևը Ֆուադ Նաջաֆլիին նշանակել է Նախիջևանում իր հատուկ ներկայացուցիչ։
Փետրվարի 1-ին Ադրբեջանի իշխանությունները գրեթե վեց ամիս փակ մնալուց հետո Նախիջևանից վերաբացել են Թուրքիայի հետ ցամաքային սահմանը։ Ըստ Ադրբեջանի սահմանային իշխանությունների՝ էքսկլավի բնակիչներին թույլատրվում է Թուրքիա անցնել միայն սեփական անձնական մեքենաներով։
Չնայած այս սահմանափակումներին՝ Նախիջևանի և Թուրքիայի սահմանային անցակետը ճանապարհորդության համար Ադրբեջանի միակ ցամաքային սահմանն է։
