Ռուսաստանի Պետդումայի նախագահ Վյաչեսլավ Վոլոդինը հայտարարել է, որ «եվրոպական ինստիտուտներին ուղղված հայտարարություններ անողները կարող են պարզապես կորցնել երկիրը»։ Ըստ նրա՝ ԵԽԽՎ-ին և Եվրախորհրդարանին ԼՂ հակամարտության կարգավորման գործընթացում ներգրավելը սրելու է իրավիճակը, նորանոր խնդիրներ է ստեղծելու․ «Պետք է տասն անգամ մտածել և կշռադատել, թե ինչպես կարող է Եվրախորհրդարանին և ԵԽԽՎ-ին ներգրավելու ցանկությունն ավարտվել՝ նույն Ուկրաինայի, Հարավսլավիայի և այլ երկրների օրինակով»։
Փետրվարի 13-ին Մոսկվայում կայացել է Ռուսաստանի Պետդումայի նախագահ Վյաչեսլավ Վոլոդինի հանդիպումը Ադրբեջանի Միլի Մեջլիսի նախագահ Սագիբա Գաֆարովայի հետ, տեղեկացնում է Պետդումայի պաշտոնական կայքը։
Վյաչեսլավ Վոլոդինը և Սահիբա Գաֆարովան Պետդումայի և Միլի Մեջլիսի միջև համագործակցության համաձայնագիր են ստորագրել։ Սա առաջին նման համաձայնագիրն է ադրբեջանական խորհրդարանի հետ։
Վոլոդինն ու Գաֆարովան քննարկել են նաև իրավիճակը Լեռնային Ղարաբաղում։ Պետդումայի նախագահն իր խոսքում նախազգուշացրել է տարածաշրջանում իրավիճակի լուծման գործում եվրոպական կառույցներին, մասնավորապես, Եվրախորհրդարանին և ԵԽԽՎ-ին ներգրավելու փորձերի հետևանքների մասին և հիշեցրել է՝ «ինչի հանգեցրեց նրանց գործունեությունն Ուկրաինայում»:
Վոլոդինն ընդգծել է, որ հակամարտության կարգավորումը պետք է հիմնված լինի Ադրբեջանի, Հայաստանի և Ռուսաստանի ղեկավարների ստորագրած համաձայնագրի հիման վրա․ «Կա որոշում, որն ընդունվել է Ադրբեջանի, Հայաստանի և Ռուսաստանի ղեկավարների մակարդակով։ Մենք առաջնորդվելու ենք դրանով և մեր կողմից անելու ենք ամեն ինչ, որ այդ պայմանավորվածությունները կյանքի կոչվեն։ Իսկ նրանք, ովքեր եվրոպական ինստիտուտներին ուղղված հայտարարություններ են անում, կարող են պարզապես կորցնել երկիրը»։
«Նախքան Եվրախորհրդարանին կոչ անելը և այդ մարմնին ինչ‑որ հարցերի լուծման մեջ ներքաշելը, պետք է պատասխանել հետևյալ հարցերին. իսկ ընդհանրապես Եվրախորհրդարանի, ԵԽԽՎ‑ի մասնակցությամբ ինչ-որ կոնֆլիկտային իրավիճակ լուծվե՞լ է։ Նման օրինակ չկա։ Տեսեք, թե ինչ էր կատարվում Ուկրաինայում։ Այսօր ուկրաինացիները «սպառման նյութ են», մեծ թվով մարդիկ են մահանում, պետականությունը կորչում է»,- ասել է Վոլոդինը։
ՌԴ Պետդումայի նախագահը նաև հիշեցրել է Հարավսլավիայի օրինակը, թե «ինչպես ԱՄՆ-ն օգնելու ցանկության քողի տակ ամեն ինչ հասցրեց այդ երկրի կործանմանը»։
«Պետք է տասն անգամ մտածել և կշռադատել, թե ինչպես կարող է Եվրախորհրդարանին և ԵԽԽՎ-ին ներգրավելու ցանկությունն ավարտվել՝ նույն Ուկրաինայի, Հարավսլավիայի և այլ երկրների օրինակով։ Նա, ով խաղաղություն է ուզում, ով իրավիճակի կարգավորում է ուզում, պետք է ոչ միայն հեռու մնա այդ խորհրդարաններից՝ թե ԵԽԽՎ-ից, թե Եվրախորհրդարանից, այլ հստակ հասկանա, որ նրանց ներքաշումը սրելու է իրավիճակը, նորանոր խնդիրներ է ստեղծելու։ Եվ եթե դա անում են, ապա պետք է պատասխանատվություն կրեն հետևանքների համար»,-ընդգծել է Վյաչեսլավ Վոլոդինը։
***
Հունվարի 23-ին հայտնի դարձավ, որ Եվրամիությունը Հայաստանում՝ հայ-ադրբեջանական սահմանին, երկու տարով քաղաքացիական առաքելություն է տեղակայելու։ Առաքելության նպատակը Հայաստանի սահմանամերձ շրջաններում կայունություն ապահովելն է և Հայաստանի ու Ադրբեջանի հարաբերությունների կարգավորմանն ուղղված ԵՄ ջանքերին նպաստող միջավայր ստեղծելը։