Արցախի գլխավոր դատախազ Գուրգեն Ներսիսյանն ընդունել է նախագահ Արայիկ Հարությունյանի՝ պետնախարարի պաշտոնը ստանձնելու առաջարկը։ Տեղեկությունը ՍիվիլՆեթի հետ զրույցում հաստատեց Արցախի դատախազության հանրային կապերի բաժնի պետ Կիմ Գաբրիելյանը։
Գուրգեն Ներսիսյանն արդեն ներկայացրել է գլխավոր դատախազի պաշտոնից ազատվելու դիմումը։ Խորհրդարանի կողմից հրաժարականն ընդունվելուց հետո կլինի պետնախարարի պաշտոնում նրա նշանակման մասին նախագահի հրամանագիրը։
***
Փետրվարի 23-ին Արցախի նախագահի գլխավորությամբ տեղի էր ունեցել կառավարության նիստ, որի ընթացքում Արայիկ Հարությունյանը հրապարակել էր Ռուբեն Վարդանյանին պետական նախարարի պաշտոնից ազատելու հրամանագիրը։
Հարությունյանը նշել էր, որ պետական նախարարի պարտականություններն առաջարկել է ստանձնել գլխավոր դատախազ Գուրգեն Ներսիսյանին։
Նոր պետական նախարարի համակարգման ոլորտում են լինելու բոլոր գործադիր մարմինները՝ բացառությամբ ուժային մարմինների և արտաքին գործերի նախարարության:
