Մոսկվան ակնկալում է, որ Հավաքական անվտանգության պայմանագրի կազմակերպության (ՀԱՊԿ) մյուս անդամների հետ Երևանի փոխգործակցության բնույթի վերաբերյալ «վնասակար քննարկումները» կդադարեն, իսկ այդ կապակցությամբ ծագաց հարցերը կառուցողական կերպով կլուծվեն։ Այդ մասին RTVI-ի հետ զրույցում ասել է Ռուսաստանի փոխարտգործնախարար Միխայիլ Գալուզինը։
Նա նաև ընդգծել է, որ ՀԱՊԿ-ը պատրաստ է իրագործել հայ-ադրբեջանական սահմանին առաքելություն տեղակայելու ծրագրերը:
«Մեր կողմից հաստատում ենք պատրաստակամությունը՝ իրագործել հայ-ադրբեջանական սահմանին ՀԱՊԿ-ի առաքելություն տեղակայելու ծրագրերը՝ ելնելով Հայաստանի անվտանգության ապահովման շահերից»,- նշել է Գալուզինը՝ հավելելով, որ ՀԱՊԿ-ը այդ աշխատանքին պատրաստ է նույն չափով, որքան Հայաստանը։
Նա նաև անդրադարձել է ՀՀ վարչապետ Նիկոլ Փաշինյանի հայտարարության, ըստ որի՝ ոչ թե Հայաստանն է դուրս գալիս ՀԱՊԿ-ից, այլ միգուցե ՀԱՊԿ-ն է լքում Հայաստանը։
«Հուսով ենք, որ «ով որտեղից է գալիս» թեմայով վնասակար քննարկումները կդադարեն, և ՀԱՊԿ շրջանակներում Երևանի հետ փոխգործակցության բոլոր հարցերը, այդ թվում՝ կազմակերպության դիտորդական առաքելության՝ Հայաստանի տարածքում տեղակայումը, կլուծվեն կառուցողական ու փոխշահավետ ձևով»,- ասել է դիվանագետը։
Գալուզինի խոսքով՝ մեծապես նաև Հայաստանի ջանքերով ոչ քիչ աշխատանքներ են կատարվել ՀԱՊԿ-ի հնարավորությունների ընդլայման տեսանկյունից։
