ԵԱՀԿ գործող նախագահ, Հյուսիսային Մակեդոնիայի ԱԳ նախարար Բույար Օսմանին ապրիլի 12-ին Բաքու կատարած այցի ընթացքում բարձրացրել է Լաչինի միջանցքի հարցը: «Արմենպրես»-ի փոխանցմամբ՝ Բույար Օսմանին այս մասին հայտարարեց Երևանում ՀՀ արտգործնախարար Արարատ Միրզոյանի հետ հանդիպումից հետո համատեղ ճեպազրույցում:
Նա նշեց, որ դեռ հունվարին ԵԱՀԿ նախագահի պաշտոնում իր առաջին գործողությունը եղել է Հայաստանի ԱԳ նախարար Արարատ Միրզոյանի հետ հեռախոսազրույցը՝ Լաչինի միջանցքի հետ կապված: Այնուհետև Վիեննայում ԵԱՀԿ մշտական խորհրդի հանդիպում է կազմակերպվել, հրավիրել են նաև Միրզոյանին՝ Լաչինի միջանցքի հետ կապված՝ հայկական կողմի տեսակետը ներկայացնելու համար:
«Այս հարցը, մի շարք մարդասիրական խնդիրներ բարձրացրեցի երեկ Բաքվում: Եվ այսօր այդ հարցերը բարձրացնելու եմ նաև այստեղ՝ հասկանալու, թե արդյոք կա երկու երկրների միջև կամուրջների կառուցման հնարավորություն: Սա է մշտական խաղաղություն ապահովելու մեր նպատակը՝ որպես ԵԱՀԿ, որպես երկրների միջև մշտական երկխոսության հարթակ»,- ասաց ԵԱՀԿ գործող նախագահը:
Ադրբեջանը 2022 թվականի դեկտեմբերի 12-ից մինչ այս պահը շարունակում է փակ պահել Արցախն աշխարհին կապող միակ մայրուղին՝ Լաչինի միջանցքը՝ բերելով կեղծ բնապահպանական պատճառաբանություններ։
