Երևան քաղաքում օդի վատ որակի հարուցիչներից մեկը, ըստ Երևանի փոխքաղաքապետ Տիգրան Ավինյանի, մեծ ծավալի փոշին է, որը գալիս է շինարարությունից. այդ մասին նա հայտարարեց մայիսի 15-ին՝ Երևանի քաղաքապետարանի գործակարգավարական խորհրդակցության ժամանակ։
«Վերահսկողությունը պետք է իրականացնենք մի փոքր ավելի խիստ։ Այս շաբաթվանից մենք սկսում ենք հասկանալ՝ փոշու հետ կապված ինչ ստանդարտներ ունենք ֆիքսած, և բոլորին ստիպելու ենք, որ այդ ստանդարտները պահպանեն»,- ընդգծեց Ավինյանը։
Մինչ այդ Քաղաքաշինության և հողի վերահսկողության վարչություն ժամանակավոր պաշտոնակատար Յակով Ասատրյանը հայտնեց, որ նախորդ շաբաթվա ընթացքում Երևանում բազմաբնակարան շենքերի ու այլ օբյեկտների շինարարական աշխատանքների նկատմամբ կազմվել է 30 արձանագրություն, որից 17-ն ապօրինի կառուցապատման ու հողազավթման, իսկ 13-ը՝ շինարարական հրապարակների համար սահմանված պայմանների չպահպանման դեպքերն են։ Նախորդ զեկույցով կրկին նույն քանակի արձանագրություններ էին կազմվել։
2022-ին ՍիվիլՆեթը արձանագրել էր, որ Երևանում շուրջ 300 բազմաբնակարան շենք է կառուցվում։ Շինարարական փոշու տեսանկյունից ամենաաղտոտված վարչական շրջանը Կենտրոնն է։
