Վարչապետ Նիկոլ Փաշինյանը կառավարությունում ընթացող ասուլիսի ժամանակ հայտարարեց, որ իր որդուն չի հորդորել հրաժարվել զոհված զինծառայողի մոր դեմ բողոքից։
«Ոչ, չեմ հորդորել իմ որոդուն, որովհետև երբ առաջին խոսակցությունը տեղի է ունեցել այդ թեմայի վերաբերյալ, իմ որդին իր փաստարկներով զրկել է ինձ իրեն նման խնդրանքով կամ կոչով դիմելու հնարավորությունից»,- մայիսի 22-ին հայտարարեց Փաշինյանը։
Նրա խոսքով՝ Հայաստանում բոլոր հարցերը պետք է լուծվեն իրավական ճանապարհով․ «Նա ինձ ասեց, որ սա է եղել քո քաղաքական գործունեության և պայքարի ամբողջ նպատակը, որից հետո ես չունեմ որևէ փաստարկ այդ կոչով կամ խնդրանքով նրան դիմելու»։
Մայիսի 17-ին Նիկոլ Փաշինյանի ընտանիքին պատկանող Հայկական ժամանակ թերթը հաղորդեց, որ փորձել են առևանգել Աշոտ Փաշինյանին՝ իր տան մերձակայքից: Աշոտ Փաշինյանին առևանգելու համար մեղադրվող 44-օրյա պատերազմի զոհված զինծառայողի մայր Գայանե Հակոբյանը մայիսի 20-ին մեկ ամսով կալանավորվել է։