Հունգարահայ համայնքը պահանջում է Օրբանի հրաժարականը

Հունգարիայի հայ համայնքը Բուդապեշտում` կառավարական շենքի մոտ, սեպտեմբերի 4-ին` տեղի ժամանակով ժամը 18:00-ին, բողոքի ակցիա կկազմակերպի` ընդդեմ հայ սպա Գուրգեն Մարգարյանին կացնահարած ոճրագործ Ռամիլ Սաֆարովին արտահանձնելու՝ Հունգարիայի իշխանությունների քայլի: Ցույցին, ի թիվս բազմաթիվ հունգարացիների, կմասնակցի նաեւ այդ երկրի նախկին վարչապետ Դյուրչան Ֆերենցը: Բողոքի ակցիան կլինի սեպտեմբերի 2-ին Բուդապեշտում կազմակերպված ցույցի շարունակությունը:

«Հունգարիայի կառավարական շենքի մոտ սեպտեմբերի 2-ին տեղի ունեցած ցույցի ժամանակ ցուցարարները պահանջել են վարչապետ Վիկտոր Օրբանի հրաժարականը: Վաղը նույնպես հազարավոր հունգարացիներ, իրենց ձայնը միացնելով հայկական համայնքին, բողոք կհղեն սեփական իշխանություններին ադրբեջանցի ոճրագործ Ռամիլ Սաֆարովին արտահանձնելու որոշման դեմ»,-«Արմենպրեսի» հետ զրույցում ասել է Հունգարիայի հայ համայնքի ներկայացուցիչ Արայիկ Գրիգորյանը:

2004թ. փետրվարի 19-ին ադրբեջանցի ոճրագործ Ռամիլ Սաֆարովը կացնահարել է Բուդապեշտում ՆԱՏՕ-ի դասընթացների մասնակցող հայ սպա Գուրգեն Մարգարյանին: Հունգարիայում Սաֆարովին դատապարտեցին ցմահ ազատազրկման 30 տարի առանց ներման իրավունքի: 2012թ. օգոստոսի 31-ին Սաֆարովը Հունգարիայի կողմից արտահանձնվեց Ադրբեջանին և ներման արժանացավ այդ երկրի նախագահ Իլհամ Ալիևի կողմից: Նույն օրը Հայաստանը կասեցրեց դիվանագիտական հարաբերությունները Հունգարիայի հետ: