Ազգային ժողովի երեկվա արտահերթ նիստը (որը նվիրված էր հայ սպայի սպանության համար Հունգարիայում ցմահ դատապարտված ադրբեջանցի սպա Ռամիլ Սաֆարովին Ադրբեջան արտահանձնելու դեպքին) կրկին ապացուցեց, որ խորհրդարանի քաղաքական մեծամասնությունը գործադիրի կցորդ է և ի վիճակի չէ որևէ ձևով հակադրվել կամ վերահսկել կառավարության գործունեությունը: Հանրապետական մի շարք պատգամավորների ելույթներում կոչեր հնչեցին, որ ազգային նման հարցերում պետք է վերկուսակցական մոտեցում ցուցաբերել և կողմ քվեարկել հայտարարության ներկայացված նախագծին:
Ուշագրավ էր, որ արտգործնախարար Էդվարդ Նալբանդյանը իր ելույթում փաստացի ընդունեց, որ Հունգարիայի իշխանությունները խաբել են իրենց: «Հայաստանը բոլոր՝ հանրապետության նախագահի, խորհրդարանի ղեկավարի, վարչապետի, արտաքին գործերի նախարարի, դեսպանների մակարդակով շարունակաբար հունգարական իշխանությունների ուշադրությունն է հրավիրել ոճրագործի հանձնման անթույլատրելիության վրա, ու բազմաթիվ անգամներ հունգարական կողմից ստացվել են միանշանակ հավաստիացումներ, որ նման քայլը բացառված է: Այդ հավաստիացումները տրվել են մեր հարցումներին ի պատասխան նաև օգոստոսի երկրորդ կեսին, ներառյալ օգոստոսի 22-ին, 23-ին, 24-ին Հունգարիայի արտաքին գործերի և արդարադատության նախարարություններում, նաև խորհրդարանում»,– ասաց նա:
Մի կողմ թողնենք այն հանգամանքը, որ հասարակությունը կոնկրետ արդյունք է ակնկալում իր կառավարությունից, ոչ թե ձախողումներն արդարացնելու փաստարկներ: Կառավարությունից նույն բանը պետք է ակնկալի նաև խորհրդարանը՝ անկախ այնտեղ ուժերի դասավորությունից ու թվից: Վերջին հաշվով՝ օրենսդիր մարմնի համար սա լավ առիթ էր գործադիրին վերահսկելու իր ֆունկցիան իրականության մեջ ցույց տալու համար:
Եթե իշխող կուսակցության պատգամավորները խորհրդարանական մյուս խմբակցություններից «ազգային հարցում վերկուսակցական մոտեցում» էին ակնկալում, ապա ինչու իրենք նույնպես վերկուսակցական մոտեցում չեն ունենում և իրենց իսկ կառավարությունից կոնկրետ պատասխան ու պարզաբանում պահանջում ձախողման համար, մանավանդ որ կառավարության ներկայացուցիչն ինքը ըստ էության ընդունում է ձախողման փաստը:
Խորհրդարանում մեծամասնություն կազմող ուժի ներկայացուցիչների բոլոր հայտարարությունների թիրախում հարևան երկիրն ու Հունգարիան էր: Ոչ մի խոսք կառավարության թերացման մասին:
Ազգային ժողովի երեկվա նիստում ՀՀԿ-ն ապացուցեց, որ ի վիճակի չէ ձախողումների համար պատասխանատվություն պահանջել: Այդ վարքագիծը լավագույնս արտահայտում է անցած հինգ տարիների ձախողումները:
