Մալթայի հավաքականի գլխավոր մարզիչ Պիետրո Գեդին Հայաստանի հետ այսօր կայանալիք մրցավեճից առաջ տված մամուլի ասուլիսում նշել է, որ դա կարևոր փորձարկում կլինի իր թիմի համար: Իտալացի մասնագետը նշել է, որ Հայաստանը մեկ քայլ առաջ է կատարել` նախորդ որակավորման փուլում վաստակելով 17 միավոր:
«Նրանք ունեն արագ ֆուտբոլիստներ, ինչի մասին վկայում է Բելառուսի հետ նրանց վերջին հանդիպումը: Այդուհանդերձ սեփական հարկի տակ մենք կօգտագործենք բոլոր խաղաքարերը: Առայժմ մտածում ենք միայն Հայաստանի հետ խաղի մասին, որից հետո նոր` Իտալիայի:
Դեռ շատ աշխատանք ունենք կատարելու, հուսով եմ` Հայաստանի դեմ դժվարին խաղում յուրաքանչյուրը կանի իրենից կախված ամեն ինչ: Վստահ եմ` մեր թիմը լավ հանդես կգա»,-Գեդինի խոսքերն է մեջբերում mfa.com-ը:
«Մենք ունենք 10 խաղացողներ, ովքեր հիանալի ելույթ են ունենում ինչպես պաշտպանությունում, այնպես էլ` հարձակման գծում: Այս բազմազանությունը թույլ է տալիս տարբեր մարտավորություններ մշակել, ինչպիսին օրինակ 1-4-3-2-1 տարբերակն է»:
Հայաստանի հետ խաղին անդրադարձել է նաև թիմի ռմբարկու Մայքլ Միֆսուդը. «Հայերի խաղերի տեսագրությունները դիտելով` չեք կարող թերագնահատել այս թիմին: Նրանք բավականին արագ են ու մեծ նպատակասլացությամբ են առաջ շարժվում:
Անկասկած չափազանց բարդ խաղ կլինի մեզ համար, բայց մենք լավ ենք պատրաստվել ու կանենք մեր ուժերի սահմաններում ամեն ինչ»:
Մարզական գործընկեր` SportArmenia.com
