Կիրակի տեղի ունեցած ՏԻՄ ընտրություններում ընտրախախտումների մասին, ընդհանուր առմամբ, եզակի ահազանգեր են ստացվել. այս մասին նշեց ՀՀ կենտրոնական ընտրական հանձնաժողովի նախագահ Տիգրան Մուկուչյանը «Արմնյուզ» հեռուստատեսության «Բանաձև» հաղորդման հյուրասրահում: «Հիմնականում ԿԸՀ-ն հետևում էր լրատվամիջոցներին, փորձ էր արվում ճշտել ընտրախախտումների մասին նյութերը: Կային տեղեկություններ, որ թեպետ վերնագրային առումով, կարծես, համապատասխանում էին, սակայն, երբ ծանոթանում էիր բովանդակությանը, այն հնարավոր չէր բնութագրել` որպես ընտրախախտում»,- ասաց նա: Ըստ Մուկուչյանի` լրատվական կայքերը հիմնականում կուտակումներն են դիտարկել` որպես ընտրախախտում, իսկ ԿԸՀ ներկայացվել է ընտրախախտումների մասին 15 դիմում:
Այսօր ողջ օրն, ըստ նրա, աշխատել են ԿԸՀ-ն և ԸԸՀ-ները, և քաղաքացիները, դիտորդները, թեկնածուներն իրավունք ունեին ներկայացնել դիմում-բողոքներ: «Իրավունք ունեին ներկայացնելու թե վերահաշվարկ իրականացնելու, թե արդյունքներն անվավեր ճանաչելու մասին բողոքներ,- ասաց Մուկուչյանը,- եթե ոմանք ունեն դիմում-բողոքներ, պետք է օգտագործել իրավական պաշտպանության մեխանիզմները, դիմեն պատկան մարմիններին»:
Անդրադառնալով թանաքանյութի շուտ ցնդելու մասին ահազանգերին` Մուկուչյանն ասաց, որ ԿԸՀ-ն այն կիրառությունից հանելու որոշում չէր կարող կայացնել, քանի դեռ ընտրական օրենսգրքում համապատասխան փոփոխություններ չեն արվել: «Այս անգամ, սակայն, փորձ էր արվել թանաքանյութն ընտրել այնպիսի որակով, որ նման խնդիր չլիներ: Եվ այդ ահազանգերը շատ ավելի քիչ էին: Այդ խնդիրը կար միայն Գյումրիի 4 տեղամասում և 4-5 տեղամասում` Վանաձորում: Կարծում ենք, որ առաջիկայում քննարկում կլինի թանաքանյութի ինստիտուտի կիրառման պահպանման հետ կապված»,- նշեց նա:
ՏԻՄ ընտրություններում մրցակցություն ապահովելու համար առնվազն 2 թեկնածուի առաջադրման անհրաժեշտության մասին օրենքը, որի արդյունքում մեկ ընտանիքից երկու անձ էր առաջադրվում ուղղակի այդ նորմը պահելու համար, ըստ Մուկուչյանի, խնդիր չէ: «Մի շարք համայնքներում կային թեկնածուներ` կինը ամուսնու դեմ, դուստրը` հոր, սակայն վերջում 133 համայնքներում ունեինք միայն 1 թեկնածու, այլ թեկնածուները ինքնաբացարկ էին հայտարարել, ինչը ևս նրանց իրավունքն է. և այդ պարագայում էլ, այդ նորմի առկայությունը չպահպանվեց»,- ասաց նա:
