Լիբիայի իշխանությունները լույս ուրբաթ փակել են օդային հաղորդակցությունը Բենղազի քաղաքի օդանավակայանի հետ, հաղորդում է AFP-ն։
«Հինգշաբթի երեկոյան մենք կարգադրել ենք դադարեցնել բոլոր թռիչքները՝ ելնելով անվտանգության պատկերացումներից»,- մեջբերում է գործակալությունը Բենղազիի օդանավակայանի ծառայության աղբյուրին։
Կարգադրությունն ուժի մեջ է մտել առանց նախօրոք ծանուցման։
Ինչպես նշում է գործակալությունը, Լիբիայի իշխանությունների որոշումը պայմանավորված է սեպտեմբերի 11-ին Բենղազիում ԱՄՆ-ի հյուպատոսության վրա իրականացված հարձակմամբ, որի հետևանքով զոհվեց Լիբիայում Միացյալ Նահանգների դեսպանը և դիվանագիտական առաքելության ևս երեք աշխատակից։
Բենղազիում կատարվածը և դրան հաջորդած հարձակումները ամերիկյան դեսպանատների վրա արաբական երկրներում այս շաբաթ հրահրել է ԱՄՆ-ում նկարված «Մուսուլմանների անմեղությունը» ֆիլմը, որը ըստ մուսուլմանների՝ վիրավորում է իրենց կրոնը և Մուհամադ մարգարեին։
Համաձայն CNN հեռուստաալիքի տեղեկատվության՝ նախօրեին ֆիլմի պատճառով ԱՄՆ-ի դիվանագիտական ներկայացուցչությունների մոտ բողոքի զանգվածային ցույցեր են տեղի ունեցել Մերձավոր Արևելքի ու Աֆրիկայի ավելի քան տասը երկրում։ Առավել զանգվածային անկարգություններ են տեղի ունեցել Սանայում (որտեղ զոհվել է չորս մարդ) ու Կահիրեում (որտեղ տուժել է մոտ 200 մարդ)․ Կահիրեում ցուցարարների բախումները ոստիկանների հետ ներկայում շարունակվում են։
