Անի Գրիգորյան, #CivilNetCheck
Սոցիալական ցանցերում և լրատվամիջոցներում տարածվում է թուրքական աղբյուրներում հայտնված տեղեկությունը, թե թուրքական Diyarbekirspor ֆուտբոլային ակումբը կարող է փոխել իր անունը՝ դառնալով Mezopotamyaspor, ինչպես նաև տարբերանշանը, որը գրեթե ամբողջությամբ հիշեցնում է Հայաստանի ներկայիս զինանշանը։ Այս տեղեկությունն բուռն քննարկումներ է առաջացրել ինչպես հայ, այնպես էլ թուրք հանրության շրջանում։
Հուլիսի 8-ին Diyarbekirspor ֆուտբոլային ակումբի նախագահ Սերկան Գենչը Թվիթերի միկրոբլոգում հերքել է տարածված այս տեղեկությունը՝ պնդելով, որ ակումբի անունը չի փոխվելու և այն շարունակելու է կրել իր ներկայիս անունը։
Diyarbekirspor kulüp Başkanı Serkan Genç:
"Peygamberler ve sahabeler diyarı unvanını almış kültürler mirası kadim şehrimizle özdeşleşmiş olan Diyarbekir ismini taşımaktan onur ve şeref duymaktayız.
Bundan önce olduğu gibi bundan sonra da gururla Diyarbekirspor ismini taşımaya… https://t.co/7mthB9Tm5J pic.twitter.com/BfOlGWqM1f— SPOR (@yenisafakspor) July 8, 2023
Գենչը նշել է, թե ակումբի անունն ու տարբերանշանը փոխելու մասին տեղեկությունները շրջանառվել են առանց ակումբի իմացության։ Նա նաև հայտնել է, որ ակումբի ղեկավարությունը շուտով հանդես կգա մամուլի հաղորդագրությամբ։
Տարածվող տարբերանշանը ներկայացվել է գրանցման
Թուրքիայի արտոնագրերի և ապրանքային նշանների պետական գրասենյակի կայքում #CivilNetCheck-ը գտավ «Mezopotamya Futbol Spor Kulübü 1977» անունը կրող տարբերանշանը գրանցելու դիմումը, որը մուտքագրվել է
2023-ի մայիսի 22-ին։ Ներկայացված տարբերանշանն իսկապես ՀՀ զինանշանի մոտիվներով է։ Նշենք, որ նման ֆուտբոլային ակումբ ներկայում գոյություն չունի։ Եվ քանի որ Diyarbekirspor ակումբը հիմնվել է 1977-ին (նույն թվականը նշված է տարբերանշանի վրա), լրատվամիջոցները եզրակացրել են, որ հենց Diyarbekirspor-ն է փոխել անունն ու տարբերանշանը։
Ինչպես նշեցինք, Diyarbekirsporի նախագահը հերքել է տարածվող լուրը։ Սակայն անհայտ է մնում, թե ով է ներկայացրել այս տարբերանշանը և ինչ նպատակով։ Թուրքական լրատվամիջոցներին այս հարցի պատասխանը ևս չի հաջողվել պարզել։
