Հրապարակվել է Ռուսաստանի խոշոր դեվելոփերների վարկանիշը. «Տաշիրը» չորրորդն է

RBC ամսագիրը կազմել է Ռուսաստանի խոշորագույն դեվելոփերների վարկանիշը՝ ըստ հասույթի չափի: Ցանկը գլխավորել է Օլեգ Դերիպասկային պատկանող «Բազովիյ էլեմենտ» հոլդինգի անդամ «Գլավստրոյ» ընկերությունը՝ $2,96 մլրդ հասույթով: Հայազգի գործարար Սամվել Կարապետյանին պատկանող «Տաշիր» խումբը վարկանիշում չորրորդն է՝ $2,6 մլրդ հասույթով։

2010-ի վարկանիշում «Գլավստրոյը» 9-րդ հորիզոնականում էր՝ $1 մլրդ հասույթով։ Նախորդ վարկանիշի համեմատ արձանագրված կտրուկ աճն ապահովվել է «Տրանսստրոյ» և «Բազելցեմենտ» մայր ընկերությունների հաշվետվությունների տվյալների կոնսոլիդացման շնորհիվ: «Գլավստրոյը» վարկանշված ընկերությունների ցանկում առաջինն է նաև ըստ պարտքի ծավալի՝ $2,72 մլրդ:

Երկրորդ հորիզոնականում Ալեքսանդր Սվետակովին պատկանող «Աբսոլյուտն» է, որի հասույթը 2011թ. կազմել է $2,93 մլրդ: Խմբի պարտքը ներկայում $100 մլն է։ Նախորդ վարկանիշի առաջատար ՍՈՒ-155 ընկերությունը, որը պատկանում է Միխայիլ Բալակինին, այս անգամ եզրափակում է վարկանիշի լավագույն եռյակը՝ $2,81 մլրդ հասույթով (պարտքը՝ $270 մլն):

Հայազգի գործարար Սամվել Կարապետյանին պատկանող «Տաշիր» խումբը վարկանիշում չորրորդն է՝ $2,6 մլրդ հասույթով ու պարտքի $350 մլն ցուցանիշով։ Հինգերորդ հորիզոնականում Անդրեյ Մոլչանովի ԼՍՌ ընկերությունն է՝ $1,77 մլրդ հասույթով:

Ցուցակում ընդգրկված ընկերություններից նախորդ վարկանիշի համեմատ ամենամեծ աճն արձանագրել է Արաս Աղալարովի Crocus Group-ը, որը դիրքերը բարելավել է 12 կետով և այժմ զբաղեցնում է 6-րդ հորիզոնականը։ Ընկերությունը 2011-ին $1,61 մլրդ-ի հասույթ է ապահովել։ Վարկանիշում ամենամեծ անկումն արձանագրել է Լև Լևաևին պատկանող AFI Development-ը, որը նախորդ 14-րդ հորիզոնականի համեմատ այս անգամ 30-րդն է:

Ռուսաստանի տասը ամենախոշոր դեվելոփերները՝ ըստ RBC-ի

Տեղը ներկայիս վարկանիշում	Տեղը նախորդ վարկանիշում	Դեվելոփերը	Հիմնական սեփականատերը	Հասույթը 2011թ. (մլրդ $)	Հասույթը 2010թ. (մլրդ $)
1	9	«Գլավստրոյ»	Օլեգ Դերիպասկա	2,96	1
2	12	«Աբսոլյուտ»	Ալեքսանդր Սվետակով	2,93	0,80
3	1	ՍՈՒ-155	Միխայիլ Բալակին	2,81,	2,07
4	2	«Տաշիր»	Սամվել Կարապետյան	2,60	2,10
5	3	ԼՍՌ	Անդրեյ Մոլչանով	1,77	1,64
6	18	Crocus Group	Արաս Աղալարով	1,61	1,48
7	7	ՊԻԿ	Սուլեյման Քերմիով	1,56	1,25
8	10	«Մորտոն»	Սեփականատերերի անունները չեն բացահայտվում	1,36	0,99
9	6	Capital Group	Վլադիսլավ Դորոնին, Պավել Տե, Էդուարդ Բերման (փայատեր)	1,30	1,20
10	5	ԴՍԿ-1	Վլադիմիր Կոպելև	1,16	1,28