Վարչապետ Տիգրան Սարգսյանն կառավարության այսօրվա նիստին հայտարարել է, որ ինքը որևէ կապ չունի Հայաստան ներկրվող գոմեշի մսի հետ, հաղորդում են կառավարության լրատվական ծառայությունից:
«Վերջին շրջանում քաղաքական սպեկուլյացիաներ կան գոմեշի մսի ներմուծման թեմայի շուրջ: Դրա դեմ պայքարելու լավագույն ձևն ամբողջական տեղեկատվությունը հանրությանը ներկայացնելն է»,- ասել է վարչապետը:
Գործադիրի ղեկավարի հանձնարարարականով գյուղատնտեսության նախարարության սննդամթերքի անվտանգության պետական ծառայության պետ Աբրամ Բախչագուլյանը պարզաբանել է, որ 2011թ. Հնդկաստանին Հայաստան է ներմուծվել 10324.93 տ գոմեշի մսի բրիկետ 6 ընկերությունների կողմից`«Մուշ» ՍՊԸ, «Ունիվերսամ Ավան» ՍՊԸ, «Արմեն Համիկ եղբայրներ» ՍՊԸ, «Մոկոնատ» ՍՊԸ, «Պարգև» ՍՊԸ, «Ալեքս Գրիգ» ՍՊԸ:
2012թ. 9 ամսվա կտրվածքով ներմուծվել է 5284.651 տ գոմեշի մսի բրիկետ 5 կազմակերպության կողմից`«Ունիվերսամ Ավան» ՍՊԸ, «Սամ Սեր գրուպ» ՍՊԸ, «Ալեքս Գրիգ» ՍՊԸ, «Արմեն Համիկ եղբայրներ» ՍՊԸ, «Պարգև» ՍՊԸ:
«Գոմեշի միս ներմուծում են այն կազմակերպությունները, որոնք ունեն մսի արտադրության ոլորտում 10 տարվա աշխատանքային փորձ, ընդհանուր մեկ արտադրական տարածքում տեղակայված միջազգային ստանդարտներին համապատասխան սեփական սպանդանոց, մսի վերամշակման արտադրամաս և սառցարան, միջազգային արտոնագրող մարմինների կողմից տրված՝ վտանգի աղբյուրների վերլուծության և կրիտիկական կետերի հսկման (HACCP) համակարգի և ստանդարտների միջազգային կազմակերպության նվազագույնը ISO 9001:2000 ստանդարտի արտոնագրեր»,– նշել է Բախչագուլյանը` հավելելով, որ Հայաստան արտահանվող գոմեշի մսի յուրաքանչյուր խմբաքանակի պատրաստման նկատմամբ հսկողություն է իրականացնում Հնդկաստանում մշտապես գտնվող ՀՀ սննդամթերքի անվտանգության գծով ներկայացուցիչը:
Վարչապետը հանձնարարել է այս խնդիրը պահել ուշադրության կենտրոնում: «Ցանկանում եմ ձեզ տեղյակ պահել, որ հայտնի քաղաքական ուժերը փորձում են զրպարտել ինձ` կապելով Հնդկաստանից միս ներմուծող այս ընկերություններն իմ անվան հետ։ Ցանկանում եմ ձեզ տեղյակ պահել, որ թվարկված այս 5 ընկերությունների հետ որևիցե առնչություն ես բացարձակապես չունեմ` ո՛չ ընկերներ, ո՛չ բարեկամներ, թաքնված անձինք այս ընկերությունների հետևում, ինձ հետ կապված չկան»,- ասել է Տիգրան Սարգսյանը:
Պետական եկամուտների կոմիտեի նախագահ Գագիկ Խաչատրյանը, իր հերթին, զեկուցել է, որ վերոնշյալ ընկերություններում ուսումնասիրությունները շարունակվում են, և նրանց հարկային պարտավորությունների հետ կապված առանձին տեղեկանք կներկայացվի:
