Ազգային ժողովը վավերացրեց Միջազգային քրեական դատարանի կանոնադրությունը՝ Հռոմի ստատուտը՝ 60 կողմ, 22 դեմ ձայներով։ Ընդդիմությունը դեմ քվեարկեց ստատուտի վավերացմանը։
«Հայաստան» խմբակցության պատգամավոր Արծվիկ Մինասյանը ասաց, որ ստատուտի վավերացումը սահմանադրությանը հակասող է և ԱԺ-ն գերազանցել է իր լիազորությունները։ ՔՊ-ական Վլադիմիր Վարդանյանն էլ նշեց՝ ստատուտի վավերացմամբ որևէ սահմանադրական նորմ չի խախտվել։
Միջազգային քրեական դատարանը 2023 թվականին ՌԴ նախագահ Վլադիմիր Պուտինին ձերբակալելու միջազգային կարգադրագիր է տվել, ինչը ենթադրում է, որ Հռոմի ստատուտը վավերացրած երկրները պետք է ձերբակալեն ՌԴ նախագահին, եթե նա այցելի այդ երկրներ։ Ռուսաստանի ԱԳՆ-ն բողոքի նոտա է հղել՝ Հայաստանի կառավարության կողմից Հռոմի ստատուտը ԱԺ-ի վավերացմանն ուղարկելու առնչությամբ։ Հայկական կողմը հակադարձել է, որ «ձերբակալման մասին խոսք չի գնում»։ Հայկական կողմը ռուսներին առաջարկել է նաև ստորագրել երկկողմ համաձայնագիր, որը երաշխիքներ կստեղծի անհանգստությունների համար։