Լևոն Քոչարյանն Ազգային ժողովի պատգամավորի մանդատ ստացավ

Հայաստանի երկրորդ նախագահ Ռոբերտ Քոչարյանի որդին՝ Լևոն Քոչարյանը, Ազգային ժողովի պատգամավորի մանդատ ստացավ։ Այս մասին հայտարարվեց Կենտրոնական ընտրական հանձնաժողովի այսօրվա՝ նոյեմբերի 6-ի, արտահերթ նիստում։

Մոտ երկու ամիս անազատության մեջ գտնվող Լևոն Քոչարյանի փաստաբանական թիմը վստահ է, որ նա մանդատը ստանալուց հետո ազատ կարձակվի։

Սեպտեմբերի 19-ին Արցախի դեմ ադրբեջանական նոր ագրեսիայի և դրան հետևած իրադարձություններին զուգահեռ Երևանում հակակառավարական ցույցեր էին իրականացվում։ Լևոն Քոչարյանը բերման էր ենթարկվել, ապա ձերբակալվել էր սեպտեմբերի 22-ին։ Նրան մեղադրանք է առաջադրվել առ այն, որ սեպտեմբերի 22-ին խաղաղ ցույցի ժամանակ նա չի կատարել կարմիրբերետավորների` ճանապարհը բացելու օրինական պահանջը և բռնություն է գործադրել ոստիկանության ծառայողների նկատմամբ։

***

Ազգային ժողովի ընդդիմադիր «Հայաստան» խմբակցության պատգամավոր Արմեն Չարչյանը հոկտեմբերի 23-ին հայտարարել էր հրաժարականի դիմում ներկայացնելու մասին։ «Հայաստան» դաշինքի նախընտրական ցուցակով հերթական հաջորդ համարները՝ պատգամավորի թեկնածուներ Միհրդատ Մադաթյանը, Անժելա Նալբանդյանը և Գերասիմ Վարդանյանը հրաժարվել էին վերցնել պատգամավորական մանդատը։ Ցուցակում հաջորդը Լևոն Քոչարյանն էր։