Ազգային ժողովի նախագահ Ալեն Սիմոնյանը Արցախի պետական ինստիտուտների պահպանումը Հայաստանի համար սպառնալիք է համարում։
«Արցախում պետականություն ստեղծելու կամ այստեղ պետականության ինչ-որ ինստիտուտներ պահելու կամ զարգացնելու նպատակ ես չեմ տեսնում: Համարում եմ, որ դա Հայաստանի անվտանգությանը ուղիղ սպառնալիք է և հարված»,- նոյեմբերի 15-ին լրագրողների հետ ճեպազրույցում ասել է Սիմոնյանը։
Ավելի վաղ ՀՀ հատուկ հանձնարարություններով դեսպան Էդմոն Մարուքյանը ևս հայտարարել էր, որ Հայաստանում Արցախի պետական ինստիտուտների պահպանումը սպառնալիք է Հայաստանի անվտանգությանը։
***
Սեպտեմբերի 19-ին Ադրբեջանը լայնածավալ հարձակում սկսեց Արցախի դեմ, որը տևեց մեկ օր և ավարտվեց սեպտեմբերի 20-ին հրադադարի մասին պայմանավորվածությամբ: Հաջորդ օրը Ադրբեջանի Եվլախ քաղաքում կայացավ Բաքվի և Ստեփանակերտի ներկայացուցիչների հանդիպումը՝ «վերաինտեգրման հարցերը քննարկելու համար»։ Սեպտեմբերի 28-ին Արցախի նախագահ Սամվել Շահրամանյանը հրամանագիր ստորագրեց 2024-ի հունվարի 1-ից Արցախի Հանրապետության գոյությունը դադարեցնելու մասին։ Արցախի բնակչությունը ենթարկվեց բռնի տեղահանման, Արցախից Հայաստան տեղափոխվեց ավելի քան 100 հազար անձ:
Արցախցիների բռնի տեղահանումից հետո տարբեր շրջանակներում բարձրացվում է Արցախի ինստիտուտների պահպանման, ՀՀ-ում Արցախի վտարանդի կառավարություն ստեղծելու հարցը։