Ռուսաստանի նախագահ Վլադիմիր Պուտինը հույս ունի ԱՊՀ երկրների ղեկավարների հետ հանդիպել դեկտեմբերի վերջին Սանկտ Պետերբուրգում կայանալիք ոչ պաշտոնական հանդիպման ժամանակ: Այդ մասին ՌԴ նախագահն ասել է ԱՊՀ կառավարությունների ղեկավարների խորհրդի նիստի մասնակիցներին ուղղված իր ուղերձում:
«Կխնդրեի ամենաջերմ ողջույնները փոխանցել ձեր պետությունների ղեկավարներին, որոնց հետ հույս ունեմ հանդիպել շատ շուտով՝ դեկտեմբերի վերջին, Եվրասիական տնտեսական բարձրագույն խորհրդի նիստում և Սանկտ Պետերբուրգում ԱՊՀ ղեկավարների ավանդական ոչ պաշտոնական հանդիպմանը»,- ասել է նա։
Այսօր՝ դեկտեմբերի 18-ին, Մոսկվայում տեղի է ունեցել ԱՊՀ կառավարությունների ղեկավարների խորհրդի նիստը, որին մասնակցել է ՀՀ փոխվարչապետ Մհեր Գրիգորյանը:
***
Ավելի վաղ ՌԴ նախագահի մամուլի քարտուղար Դմիտրի Պեսկովն ասել էր, որ դեկտեմբերի վերջին Ռուսաստանում կայանալիք ԱՊՀ ոչ պաշտոնական գագաթնաժողովի շրջանակներում Փաշինյան-Պուտին երկկողմ հանդիպում նախատեսված չէ, բայց, ըստ նրա՝ «դա հիանալի հնարավորություն կլինի խոսելու համար»:
Ազգային ժողովի նախագահ Ալեն Սիմոնյանը կարծում է, որ Հայաստանը պետք է մասնակցի դեկտեմբերին Սանկտ Պետերբուրգում կայանալիք Եվրասիական տնտեսական միության գագաթնաժողովին․ «Որոշում այս պահին չկա, բայց անձամբ ես կարծում եմ, որ ԵԱՏՄ նախագահությունը ստանձնելու համար Հայաստանը պետք է մասնակցի, քանի որ մենք այս կառույցի նախագահությունն ենք ստանձնում»,- նոյեմբերի 28-ին խորհրդարանում լրագրողների հետ զրույցում հայտարարել էր Սիմոնյանը։
Հայ-ռուսական լարված հարաբերությունների ֆոնին վարչապետ Նիկոլ Փաշինյանը վերջին ամիսներին չի մասնակցել ՀԱՊԿ, ԱՊՀ նիստերին։ Կառույցների նիստերին չեն մասնակցել նաև ՀՀ արտգործնախարարը, պաշտպանության նախարարը, անվտանգության խորհրդի քարտուղարը, Ազգային ժողովի նախագահը։
