ՍիվիլՆեթի փաստերի ստուգման թիմը՝ #CivilNetCheck-ը, «Շաբաթվա ֆեյքերը» հաղորդման շրջանակում անդրադառնում է Վրաստանում տարբեր աստղերի համերգների մասին կեղծ տեղեկություններին և հայկական մեդիայում իսրայելական լրատվամիջոցների կեղծած լուրերի ի հայտ գալուն։
-
Փաշինյանն ու Կալասը քննարկել են Հայաստան-ԵՄ համագործակցությունը
Տիրանայում վարչապետ Նիկոլ Փաշինյանը հանդիպել է ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասի հետ: Այս մասին հայտնում են կառավարությունից։ Զրուցակիցները քննարկել են Հայաստան-Եվրոպական միություն համագործակցության հետագա զարգացմանը, ընթացիկ օրակարգին վերաբերող հարցեր: Կողմերը գոհունակություն են հայտնել հարաբերությունների հետևողական զարգացման ուղղությամբ տեղի ունեցող գործընթացներից և նշել, որ բարձր մակարդակի ակտիվ շփումները նոր ազդակ կհաղորդեն համատեղ ծրագրերին: Նիկոլ Փաշինյանը և Կայա Կալասը մտքեր են փոխանակել նաև Հայաստանի և Ադրբեջանի միջև բանակցային գործընթացի վերաբերյալ և կարևորել խաղաղության համաձայնագրի ստորագրումը` ի նպաստ տարածաշրջանում կայունության և համագործակցության:
-
23 համարի ավտոբուսը բախվել է բենզալցակայանին․ վիրավորներ կան
Մայիսի 16-ին՝ ժամը 15․40-ին, ահազանգ է ստացվել, որ Սեբաստիա փողոցում՝ Եռաբլուրի մոտ, թիվ 23 երթուղին սպասարկող ավտոբուսը բախվել է ճամփեզրի էլեկտրասյանը և բենզալցակայանին։ Այս մասին հայտնում են ՆԳՆ ոստիկանության մամուլի ծառայությունից; Դեպքի վայր են մեկնել Ոստիկանության և Փրկարար ծառայության աշխատակիցներ, որոնք կատարել են իրավիճակից բխող գործողություններ։ Նախնական տվյալներով՝ ճանապարհատրանսպորտային պատահարի հետևանքով տուժել է 8 անձ։ Հանգամանքները պարզվում են։
-
Փոխարտգործնախարարների եռակողմ հանդիպումը շատ հետաքրքիր ձևաչափ է․ Փաշինյան
Թբիլիսիում տեղի ունեցած Հայաստանի, Վրաստանի և Ադրբեջանի փոխարտգործնախարարների հանդիպումը շատ հետաքրքիր ձևաչափ է։ Տիրանայում եվրոպական քաղաքական միության գագաթնաժողովի մեկնարկից առաջ լրագրողների հետ զրույցում ասել է Հայաստանի վարչապետ Նիկոլ փաշինյանը։ Վարչապետը հույս է հայտնել, որ այս ձևաչափը կվերածվի ավելի լայն ձևաչափի։ «Ես գնահատում եմ Վրաստանի վարչապետի ջանքերն այս ձևաչափի հաջողությունն ապահովելու ուղղությամբ»,- հայտարարել է Նիկոլ Փաշինյանը։ Ապրիլի 17-ին Թբիլիսիում կայացել էր Հայաստանի, Վրաստանի և Ադրբեջանի փոխարտգործնախարարների հանդիպումը։ Սա փոխնախարարների մակարդակով առաջին եռակողմ հանդիպումն է եղել։
-
Ի՞նչ ինքնիշխանության մասին է խոսքը, երբ ՀՀ պաշտոնյան վախենում է
Հայաստանի քաղաքական դաշտը Քոչարյան-Սարգսյան-Փաշինյան եռանկյունին հաղթահարելու շանս դեռ չունի, ասում է քաղաքական մեկնաբան Հակոբ Բադալյանը ՍիվիլՆեթի Արշալույս Մղդեսյանի հետ զրույցում: Նրա խոսքով՝ խորհրդարանական ընտրությունների մոտենալուն զուգահեռ հայհոյախառն հայտարարությունները սաստկանալու են, բովանդակությունը նվազելու է, ինչն էլ շատ պարզունակ է դարձնում հանրային քննարկումները: Ըստ Բադալյանի՝ այս գործոններով պայմանավորված՝ Հայաստանը դառնում է խոպան հիբրիդային պատերազմի համար:
-
Ֆրանսիան աջակցում է Հայաստանի և Ադրբեջանի՝ խաղաղության հասնելու ջանքերին․ Մակրոն
Ֆրանսիան աջակցում է Հայաստանի և Ադրբեջանի ջանքերին՝ վերջնական խաղաղության հասնելու և խաղաղության պայմանագիր կնքելու ուղղությամբ։ Այս մասին ասել է Ֆրանսիայի նախագահ Էմանուել Մակրոնը՝ Տիրանայում Եվրոպական քաղաքական համայնքի գագաթնաժողովի լիագումար նիստում ելույթի ժամանակ։ «Մենք լիովին աջակցում ենք երկու կողմերին էլ այս կարևոր փաստաթղթի՝ խաղաղության պայմանագրի ստորագրման ճանապարհին»,- ասել է Մակրոնը։
-
Փաշինյանն ու Ալիևը կարևորել են խաղաղության պայմանագրի ստորագրման գործընթացի շարունակականությունը
Հայաստանի վարչապետ Նիկոլ Փաշինյանն ու Ադրբեջանի նախագահ Իլհամ Ալիևը կարևորել են Հայաստան-Ադրբեջան խաղաղության համաձայնագրի տեքստի համաձայնեցումը։ Այս մասին հայտնում են կառավարությունից։ Ալբանիայի մայրաքաղաք Տիրանայում կայացած հանդիպման ժամանակ կողմերը քննարկել են ընթացիկ վիճակը և կարևորել ստորագրման ուղղությամբ գործընթացի շարունակականությունը: Տիրանայում անցկացվող Եվրոպական քաղաքական համայնքի 6-րդ գագաթնաժողովի շրջանակում տեղի է ունեցել Հայաստանի Հանրապետության վարչապետ Նիկոլ Փաշինյանի և Ադրբեջանի Հանրապետության նախագահ Իլհամ Ալիևի հանդիպումը։
-
ԵՄ-ն պատրաստ է ներդրումներ անել տարածաշրջանային կապուղիների ոլորտում․ Ուրսուլա Ֆոն
Ես և Եվրոպական խորհրդի նախագահը շնորհավորեցինք Հայաստանի և Ադրբեջանի ղեկավարներին խաղաղության պայմանագրի վերջնականացման կապակցությամբ։ X-ի իր միկրոբլոգում գրել է Եվրոպական հանձնաժողովի նախագահ Ուրսուլա Ֆոն դեր Լայենը։ «Սա կարևոր քայլ է առաջ։ Եվ մենք սպասում ենք դրա արագ ստորագրմանը։ Եվրամիությունը պատրաստ է ներդրումներ անել տարածաշրջանային կապուղիների ոլորտում՝ ամբողջ տարածաշրջանը միմյանց և մեր Միությանը ավելի մոտեցնելու համար»,- գրել է Ֆոն դեր Լայենը։ Հայաստանի վարչապետ Նիկոլ Փաշինյանը Տիրանայում անցկացվող Եվրոպական քաղաքական համայնքի 6-րդ գագաթնաժողովի շրջանակներում հանդիպում է ունեցել Եվրոպական խորհրդի նախագահ Անտոնիու Կոշտայի և Եվրոպական հանձնաժողովի նախագահ Ուրսուլա ֆոն դեր Լայենի հետ:
-
Յաղդան. երկու հայացք հունական գյուղից
Լոռու մարզի հունական Յաղդան գյուղում խնդիրներն անսպառ են։ Ընտանիքի համար ապրուստ վաստակելն իրական փորձություն է։ Ոռոգման ջուր չկա, հույսը անձրևն է՝ ոչ այնքան թույլ, որ հողը չոր մնա, ոչ այնքան առատ, որ փչացնի բերքը, ինչպես նախորդ տարի էր։ Գյուղում երկար կյանք ապրած Համլետ Առուշանյանն ու Ֆրանիսա-Արցախ-Հայաստան երթուղին բռնած Արմեն Ռակեդջյանը իրարից մի քանի մետր հեռավորության վրա են ապրում։ Երկուսն էլ պատմելու բան ունեն Յաղդանի մասին։
