Առաջիկայում նախատեսվում է շտապօգնության ծառայություն մատուցել նաև մոպեդներով: Այդ մասին այսօր՝ հունվարի 22-ին, Երևանի քաղաքապետարանի գործակարգավարական նիստի ընթացքում ասել է առողջապահության վարչության պետի պաշտոնակատար Դավիթ Կարապետյանը:
«Առաջիկայում նախատեսում ենք ծառայություն մատուցել նաև մոպեդներով: Իհարկե, այստեղ աշխատանք ունենք անելու և համապատասխան մասնագետներ գտնելու, որոնք կունենան համապատասխան կրթություն և կարողանան վարել մոպեդ: Նրանք ծառայություն կմատուցեն ոչ թե հիվանդանոցային պայմաններում բուժման իրականացում պահանջող դեպքերին, այլ միայն առաջին բուժօգնության սահմաններում»,- ասաց նա:
Դավիթ Կարապետյանի խոսքով՝ հունվարի առաջին 18 օրվա ընթացքում շտապ բուժօգնության ծառայության կողմից իրականացվել է 19 595 կանչ, որը նախորդ տարվա համեմատությամբ 2 423 կանչով կամ 14 տոկոսով ավելի է:
Առողջապահության վարչության պետը նշում է, որ յուրաքանչյուր 20 հազար բնակչին շտապօգնության 1 շարժակազմ է հասնում: Պաշտոնական տվյալների համաձայն՝ Երևան քաղաքի բնակչության՝ 1 միլիոն 75 հազարի պարագայում արդեն իսկ 53-55 շարժակազմ է պետք, ուստի քաղաքապետարանը դիմել է առողջապահության նախարարին՝ շարժակազմերի թիվն ավելացնելու ակնկալիքով: Այժմ մայրաքաղաքում առկա է շտապօգնության 43 շարժակազմ։
