Civilnet
Տավուշում տեղի է ունենում սահմանադրական կարգի տապալում, եթե սահմանազատումն իրականացվի այնպես, ինչպես նախատեսում է կառավարությունը․ կարծում է 44-օրյա պատերազմի ու դրանից հետո սահմանային այլ գործողությունների մասնակից, «Ազատազէն» ՀԿ-ի ղեկավար Իշխան Գևորգյանը, որը երեկվանից նստացույց է սկսել կառավարության դիմաց՝ «Ես հաշտ չեմ» պաստառով։
«Եթե կարելի է մեկի հողը խլել ու տալ թշնամուն, ուրեմն կարելի է բոլորինն էլ խլել։ Հայաստանի տարածքներն ու հողը կարող է փոփոխվել միայն սահմանադրական հանրաքվեի միջոցով, մնացած տարբերակներն ապօրինի են»,- ասում է Իշխանը։
Նրա կարծիքով՝ սահմանազատում պետք է լինի, սակայն լեգիտիմ ու համաձայնեցված։
«Սահմանազատումը չպետք է լինի հետևյալ տրամաբանությամբ՝ սա տվեք մեզ, հետո կհասկանանք՝ ինչ է լինելու։ Սա նշանակում է՝ Հայաստանի զավթում մերոնց թողտվությամբ։ Դա էլ դառնում է սահմանադրական կարգի տապալում, երբ իշխանությունը ոստիկանական զորքի միջոցով մարդկանց հանում է Կիրանցից, ականազերծում է իրականացվում ու տարածքները փոխանցում Ադրբեջանին»,- նշեց մեր զրուցակիցը։
Նա առաջարկում է հաշտ չլինել այս գործընթացի հետ։
Նա միայնակ է ակցիան սկսել, նախատեսում է երեք օր լինել կառավարության դիմաց ու մարդկանց հետ զրուցել, քննարկել իրավիճակը։ Մինչ այդ էլ պարբերաբար եղել է Կիրանցում, ուսումնասիրել տեղանքն ու գնահատել ռիսկերը։
Իշխանը կառավարության կողմից հրապարակված միակ քարտեզն է պաստառ դարձրել՝ վրան մոտավոր գծել այն շփման գիծը, որը առկա է, սակայն փոխվում է սահմանազատման հետևանքով։
Գևորգ Թոսունյան
Լուսանկարը՝ հեղինակի
Պատմություններ
