Մայր աթոռը հայտարարություն է տարածել Գարեգին Երկրորդի մուտքը Սարդարապատ խոչընդոտելու վերաբերյալ

Մայր աթոռի տեղեկատվական համակարգը հաղորդագրություն է տարածել այսօր՝ ավելի վաղ, Ն.Ս.Օ.Տ.Տ. Գարեգին Երկրորդ կաթողիկոսի մուտքը Սարդարապատի հուշահամալիր խոչընդոտելու առնչությամբ։

«Մայիսի 28-ին՝ Հանրապետության տոնի առիթով, Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի ու Մայր Աթոռ Սուրբ Էջմիածնի միաբանների՝ Սարդարապատի հուշահամալիր այցի ընթացքում ոստիկանների կողմից Հայոց Հայրապետի ու եկեղեցականների նկատմամբ դրսևորած դատապարտելի պահվածքը և հուշահամալիրի տարածք մուտք գործելու հարուցված արգելքներն ու բռնի գործողությունները հերթական դրվագն են իշխանությունների ամոթալի ու ապազգային գործունեության։

Փառք Տիրոջ, որ հակառակ ոստիկանների կողմից բռնությունների ու հարուցված արգելքների Վեհափառ Հայրապետը հուշակոթողի առջև աղոթք բարձրացրեց առ Աստված մայիսյան հերոսամարտերում նահատակված քաջարի հայորդիների հոգիների հանգստության համար:

Թող Երկնավոր Տերն անսասան պահի հայոց անկախ պետականությունը և հանապազ օրհնի ու ապահով և անվտանգ կյանք շնորհի համայն մեր ժողովրդին»,- ասված է հաղորդագրությունում։

Այսօր Սարդարապատի հուշահամալիր է այցելել նաև Հայաստանի բարձրագույն ղեկավարությունը՝ վարչապետի ու նախագահի գլխավորությամբ։ Մինչ կառավարության անդամները կժամանեին հուշահամալիր, ոստիկանները փորձել են խոչընդոտել Ամենայն Հայոց կաթողիկոսի մուտքը: Համացանցում տարածված տեսանյութերում երևում է ոստիկանական պատը, որը թույլ չի տալիս Վեհափառին մտնել հուշահամալիր:

Վաղ առավոտյան Սարդարապատում էր նաև «Տավուշը հանուն հայրենիքի շարժումը», որն այնուհետև ավտոերթով շարժվել է Հանրապետության հրապարակ։

Մեկնաբանել