Խաղաղության պայմանագրի նախագիծը վերջանականացնելու իրական հնարավորություն կա․ Միրզոյան

Խաղաղության պայմանագրի նախագիծը վերջնականացնելու իրական հնարավորություն կա, հայտարարել է Հայաստանի արտաքին գործերի նախարար Արարատ Միրզոյանը։

«Հայաստանը հավատարիմ է Ադրբեջանի հետ հարաբերությունների կարգավորման և սահմանների սահմանազատման գործընթացին՝ հիմնված 1991-ի Ալմա Աթայի հռչակագրի հիմքով տարածքային ամբողջականության փոխադարձ ճանաչման վրա։ Կա իրական հնարավորություն, պատմական պահ՝ վերջնականացնելու խաղաղության պայմանագրի նախագիծը, որի ստորագրումը կարող է նոր դուռ բացել տարածաշրջանում երկարատև խաղաղության համար»,- ԱՄՆ փոխպետքարտուղար Ջեյմս Օ՛Բրայենի մասնակցությամբ ՀՀ-ԱՄՆ ռազմավարական երկխոսության նիստի ժամանակ հայտարարել է Հայաստանի ԱԳՆ ղեկավարը։

Միրզոյանն ընդգծել է ՀՀ ինքնիշխանությանը, անկախությանը և տարածքային ամբողջականությանն ԱՄՆ շարունակական աջակցության կարևորությունը։ Նրա կարծիքով՝ Հայաստանի և Միացյալ Նահանգների ընդլայնված գործընկերությունը «ունի մեծ ներուժ նպաստելու Հարավային Կովկասում կայուն և արժանապատիվ խաղաղության հաստատմանը»։

«Այսօր մենք մեր օրակարգում քննարկում ենք կոնկրետ քայլերի և ծրագրերի լայն շրջանակ՝ սկսած տնտեսության ու էներգետիկ ոլորտի դիվերսիֆիկացիայից մինչև պաշտպանական ոլորտում համագործակցություն և արդարադատության ոլորտի բարեփոխումներ»,- ասել է նա։

Արարատ Միրզոյանը նաև հայտարարել է, որ հայկական կողմը ցանկանում է ՀՀ-ԱՄՆ ռազմավարական երկխոսությունը փոխարինել ռազմավարական գործընկերության հանձնաժողովով, ինչը հնարավորություն կտա ավելի մեծ խորությամբ կառուցելու փոխգործակցությունը:

Հայաստանի արտաքին գործերի նախարարությունը օրերս հայտարարել էր, որ հայկական կողմը պատրաստ է առաջիկա մեկ ամսվա ընթացքում ստորագրել խաղաղության պայմանագիրը, քանի որ այն «բավականաչափ հասունացած է ստորագրման համար»։

https://civilnet.am/news/780831/%d5%a8%d5%bd%d5%bf-%d5%a1%d5%ac%d5%ab%d6%87%d5%ab%d5%9d-%d5%a5%d5%a9%d5%a5-%d5%b0%d5%a1%d5%b5%d5%a1%d5%bd%d5%bf%d5%a1%d5%b6%d5%ab-%d5%bd%d5%a1%d5%b0%d5%b4%d5%a1%d5%b6%d5%a1%d5%a4%d6%80%d5%b8%d6%82%d5%a9%d5%b5%d5%b8%d6%82%d5%b6%d5%a8-%d5%b9%d6%83%d5%b8%d5%ad%d5%be%d5%ab-%d5%ad%d5%a1%d5%b2%d5%a1%d5%b2%d5%b8%d6%82%d5%a9%d5%b5%d5%a1%d5%b6-%d5%ba%d5%a1%d5%b5%d5%b4%d5%a1%d5%b6%d5%a1%d5%a3%d5%ab%d6%80-%d5%b9%d5%ab-%d5%af%d5%b6%d6%84%d5%be%d5%ab/