Հուլիսի 22-ին Եվրոպական միության խորհրդի՝ արտաքին գործերի նախարարները որոշումներ են կայացրել՝ մեկնարկելով Եվրոպական խաղաղության գործիքի ներքո Հայաստանին աջակցության տրամադրման և վիզայի ազատականացման երկխոսությունը։ Այս մասին հայտարարել է Հայաստանի արտաքին գործերի նախարար Արարատ Միրզոյանը։
«Մենք ողջունում ենք ԵՄ կողմից՝ արտաքին գործերի նախարարների մակարդակով կայացված պատմական որոշումները Եվրոպական խաղաղության գործիքի ներքո Հայաստանին աջակցության տրամադրման և վիզայի ազատականացման երկխոսության մեկնարկի վերաբերյալ։ Սա ՀՀ-ԵՄ գործընկերության շատ կարևոր հանգրվան է, գործընկերություն, որը խորանում է՝ հիմնված ընդհանուր արժեքների և սկզբունքների, ինչպես նաև կայունության, խաղաղության և բարեկեցության տեսլականի վրա»,- ասել է Միրզոյանը։
Հայաստանում Ֆրանսիայի դեսպան Օլիվիե Դեկոտինյին գրառում է արել X-ում․ «Եվրամիությունը Հայաստանի հետ սկսում է երկխոսություն վիզային ռեժիմի ազատականացման շուրջ։ Հայ ժողովրդի ձգտումը դեպի Եվրոպա արտացոլող կարևոր քայլ։ Գնդակն այլևս Հայաստանի դաշտում է, որը պետք է համապատասխանի եվրոպական չափորոշիչներին»։
Եվրամիությունը Հայաստանին տրամադրում է մուտք Խաղաղության եվրոպական հիմնադրամ։
➡️ Ֆրանսիայի նախաձեռնությամբ ընդունված որոշում։
➡️ Ինչպես Ուկրաինան կամ Մոլդովան, Հայաստանը կօգտվի իր զինված ուժերին ուղղված օգնությունից։
➡️ 10 մլն եվրոյի առաջին օգնությունը կլինի նյութատեխնիկական: https://t.co/MEzCAEA5L1— Olivier Decottignies (@O_Decottignies) July 22, 2024
Վարչապետ Նիկոլ Փաշինյանը, մայիսի 14-ին ելույթ ունենալով Կոպենհագենի ժողովրդավարության գագաթնաժողովին, հայտարարել էր՝ Հայաստանը սպասում է Խաղաղության եվրոպական հիմնադրամում ներառվելու որոշմանը։
