Շուշան Ստեփանյան, #CivilNetCheck
Սոցցանցերում IDBank-ի անունից տարածվում են կեղծ գովազդային գրառումներ, որոնցում բանկի հաճախորդներին առաջարկվում է մասնակցել հարցման և ստանալ 20 000 դրամ։ Գովազդային գրառումների իրական նպատակը, սակայն, հաճախորդների բանկային հաշիվներին հասանելիություն ստանալն է։
Վերջերս նույնաբովանդակ կեղծ գովազդներ էին տարածվում նաև «Ինեկոբանկի» անունից, ինչին #CivilNetCheck-ն արդեն անդրադարձել է։
Գրառումը տարածվում է օգոստոսի 30-ին ստեղծված «Promo id» ֆեյսբուքյան էջի միջոցով։ Էջը ստեղծվելուց օրեր անց՝ սեպտեմբերի 2-ին, տեղադրվել է IDBank-ի անունից կեղծ գրառումը, որն էջի միակ ակտիվությունն է։
Հարցման հղումը տանում է IDBank-ի պաշտոնական կայքէջը նմանակող կեղծ էջ։ Զեղծարարները օգտագործել են IDBank-ի պաշտոնական՝ idbank.am դոմեյնին մոտ՝ idiiapp.xyz դոմեյնը։
Վատ թարգմանված հայերենով հարցերին պատասխանելուց հետո հայտնվում է պատուհան, որտեղ պետք է հեռախոսահամարը և գաղտնաբառը գրել։ Սա ֆիշինգային հարձակում է, որի նպատակը հաճախորդի մուտքանունն ու գաղտնաբառը ստանալն է, որից հետո զեղծարարները կարող են բանկային հաշիվները տնօրինել։
Նման դեպքերում հնարավոր է նաև, որ զանգահարեն և ներկայանան որպես բանկի աշխատող՝ խնդրելով հայտնել SMS-ով ստացված կոդը։
#CivilNetCheck-ի հետ զրույցում IDBank-ից ևս հերքել են իրենց կապը կեղծ հարցումների հետ։
Նման դեպքերում պետք է ուշադրություն դարձնել կայքի դոմեյնին, ինչպես նաև հիշել, որ բանկի աշխատակիցները երբեք չեն խնդրի հայտնել SMS-ով ստացված կոդը: Իսկ եթե արդեն տրամադրել եք ձեր տվյալները կամ կասկածներ ունեք, պետք է դիմեք ձեր բանկին պաշտոնական հեռախոսահամարով։
Այսպիսով, IDBank-ի և այլ բանկերի անունից կեղծ գովազդային գրառումներ են տարածվում, որոնց նպատակը հաճախորդների բանկային հաշիվներին հասանելիություն ստանալն է։
