OC Media-ն հրաժարվել է Վրաստանի կառավարության ռեգիստրում գրանցվել որպես «օտարերկրյա տերության շահերն իրականացնող կազմակերպություն»՝ երկուշաբթի լրացած վերջնաժամկետի ավարտից հետո:
OC Media-ն՝ տարածաշրջանային լրատվական հարթակը, որը գրանցված Վրաստանում և որի կենտրոնակայանը Թբիլիսիում է, միանում է տեղական լրատվամիջոցների և հասարակական կազմակերպությունների մեծամասնությանը բոյկոտելու վիճելի օրենսդրությունը:
OC Media-ի համահիմնադիր և գործադիր տնօրեն Մարիամ Նիկուրաձեն հայտարարել է, որ տվյալների բազայում գրանցվելը «հակասում է մեր առաքելությանը»:
«Այս օրենքը թափանցիկության մասին չէ։ Այս օրենքը նպատակ ունի ոչնչացնել Վրաստանում անկախ լրատվամիջոցները և քաղաքացիական հասարակությունը: Որպես այդպիսին, մենք մաքուր խղճով չենք կարող ենթարկվել դրան»,- ասել է նա:
Երկուշաբթի վերջնաժամկետը լրանալուց հետո արդարադատության փոխնախարար Թամար Տկեշելաշվիլին ասել է, որ 476 կազմակերպություն կամավոր դիմում է ներկայացրել գրանցման համար։ Տկեշելաշվիլին ավելի վաղ հայտարարել էր, որ երկրում գործում է շուրջ 30 000 ՀԿ և լրատվամիջոց։ Նրանցից մոտ 1200-ը պետական են, որոնց գրանցումը պարտադիր չէ:
Իշխող «Վրացական երազանք» կուսակցությունը մայիսի 28-ին ընդունել է օտարերկրյա գործակալների մասին օրենքը՝ փողոցային զանգվածային ցույցերի և իրավապաշտպան խմբերի և երկրի արևմտյան գործընկերների կողմից դրանից հրաժարվելու համատարած կոչերի ֆոնին:
Օտարերկրյա գործակալների մասին օրենքի համաձայն՝ այն կազմակերպությունները, որոնք իրենց եկամտի 20 տոկոսից ավելին արտերկրից են ստանում, մինչև երկուշաբթի պետք է գրանցվեին տվյալների բազայում։ Այն կազմակերպությունները, որոնք հրաժարվում են կատարել համապատասխան պարտավորությունները, կշարունակեն տուգանվել 25,000 լարիի (9300 դոլար) չափով, քանի դեռ չեն համաձայնել դա անել:
Արդարադատության նախարարությունը սեպտեմբերի 3-ից իրավունք կունենա հարկադիր գրանցել կազմակերպություններին, սկսել տուգանել և սկսել «վերահսկել» նրանց ֆինանսները, ներքին հաղորդակցությունն ու փաստաթղթերը։
«Առաջիկա ամիսները դժվար կլինեն մեզ համար, քանի որ մենք առերեսվում ենք ֆինանսական պատժամիջոցների և նույնիսկ քրեական հնարավոր հետապնդման»,- ասել է OC Media-ի լրագրող Նիկուրաձեն։ «Բայց մենք պարտավոր ենք մեր ընթերցողների առջև հավատարիմ մնալ մեր արժեքներին»,- նշել է նա:
Օգոստոսի 26-ին Վրաստանի սահմանադրական դատարանը սկսել է քննել մի քանի հայց, որոնք վիճարկում են օտարերկրյա գործակալների օրենքը:
Հայցվորները, այդ թվում նախագահ Սալոմե Զուրաբիշվիլին, 38 պատգամավոր և ավելի քան 120 քաղաքացիական և հասարակական խումբ, պնդում են, որ օրինագիծը Վրաստանին կարող է շեղել արևմտամետ ուղեգծից, որը ամրագրված է երկրի սահմանադրությամբ:
Օրենքի ընդունումից հետո ԵՄ-ն հայտարարել է, որ Վրաստանի անդամակցության հայտը դադարեցվել է, իսկ ԱՄՆ-ն արգելքներ է սահմանել վրացի մի քանի անձանց հանդեպ, որոնք ներգրավված են եղել դրա ընդունման գործում:
Սպասվում է, որ առաջիկա օրերին Սահմանադրական դատարանը որոշում կկայացնի՝ օրենքի դեմ գործերը քննել-չքննելու վերաբերյալ, և եթե որոշի քննել, ապա ժամանակավորապես կկասեցվի օրենսդրությունը՝ մինչև վերջնական որոշման կայացումը:
