«Տավուշը հանուն հայրենիքի» շարժման ղեկավար Բագրատ արքեպիսկոպոս Գալստանյանը հանդիպում է ունեցել Հայաստանի երկրորդ և երրորդ նախագահներ Ռոբերտ Քոչարյանի և Սերժ Սարգսյանի հետ, հաղորդում է «Սրբազան պայքար» տելեգրամյան ալիքը։
«Սրբազան պայքարի 2024թ. սեպտեմբերի 22-ին Երևանի մարզահամերգային համալիրում կայանալիք մեծ հավաքին ընդառաջ Շարժման առաջնորդ Բագրատ արքեպիսկոպոս Գալստանյանը հանդիպել է հայաստանյան և արցախյան քաղաքական դաշտի ուժերի, կուսակցությունների, ՀՀ երկրորդ և երրորդ նախագահներ Ռոբերտ Քոչարյանի և Սերժ Սարգսյանի հետ: ՀՀ առաջին նախագահ Լևոն Տեր-Պետրոսյանի հետ վերջինիս գրասենյակի կողմից ներկայացված հարգելի պատճառներով, հանդիպում դեռևս չի եղել»,- նշվում է տելեգրամյան ալիքի հաղորդագրությունում:
Տավուշի հատվածում իրականացված սահմանազատման գործողությունների դեմ «Տավուշը հանուն հայրենիքի» շարժումը՝ Հայ առաքելական եկեղեցու Տավուշի թեմի առաջնորդ Բագրատ արքեպիսկոպոս Գալստանյանի ղեկավարությամբ, ապրիլ-մայիսից բողոքի ցույցեր է անցկացնում Հայաստանում՝ պահանջելով վարչապետ Նիկոլ Փաշինյանի հրաժարականը։
