Աղետի գոտում նախորդ երեք տարիների ընթացքում բնակբաշխման գործընթացը իրականացնող ՀՀ քաղաքաշինության նախարարության կողմից Գյումրու անօթևանների հերթացուցակում հաշվառված մոտ 400 անօթևան ընտանիք, տարաբնույթ պատճառներով զրկվել են բնակարան ստանալու իրավունքից. հաղորդում է «Շիրակ կենտրոն» ՀԿ-ն: Այդ ընտանիքները համալրել են Գյումրու վագոն-տնակներում ապրող ավելի քան 3500 այն անօթևան ընտանիքների շարքերը, որ չունեն երկրաշարժի հետևանքով անօթևանի կարգավիճակ և նույնիսկ անհայտ է, թե երբևէ կունենան բնակարաններ: Համենայնդեպս, պետությունը նրանց բնակարաններ տրամադրելու որևէ պարտավորություն չի ստանձնել: Այդպիսի ընտանիքների թվում կան տասնյակ միայնակ տարեցներ, որոնց տնակները վաղուց շարքից դուրս են եկել, և իրենք պարզապես ի վիճակի չեն գոնե մասնակի նորոգել իրենց կացարանները:
«Շիրակ կենտրոնի» աշխատակիցները բնակարանային իրավունքից զրկելու պատճառներին ծանոթանալու և տեսանյութ պատրաստելու նպատակով, այսօր այցելել են Գյումրու Մանուշյան փողոցի հարակից տարածքի տնակային ավանում բնակվող Դոլորես Մանուկյանին. միայնակ կինն ապրում է կիսափուլ տնակում, որի բոլոր անկյուններից ներս է լցվում անձրևաջուրը, տնակը նաև լի է առնետներով. նրա կենսապայմանները ներկայացվում են տեսանյութում:
