Civilnet
Զինծառայողների ապահովագրության հիմնադրամը վերջին չորս տարում հատկացրել է ավելի քան 105 միլիարդ դրամ՝ զոհված, անհայտ կորած և ֆունկցիոնալ սահմանափակումներ ունեցող զինծառայողների ընտանիքներին:
Հիմնադրամը, որի միջոցները գոյանում են հարկատուների դրոշմանիշային վճարներից և սեփական ակտիվների կառավարումից, զինվորական ծառայության ընթացքում զոհված, անհայտ կորած և վիրավորված զինծառայողների ընտանիքների սոցիալական պաշտպանության հիմնական երաշխավորն է։
Հիմնադրամի թարմացված կայքի գլխավոր էջում այժմ հասանելի է վիճակագրություն՝ ներառյալ հավաքագրված միջոցների և հատկացումների դինամիկան ըստ տարիների, շահառուների քանակական բաշխվածությունը, ինչպես նաև սեփական ակտիվների կառավարումից ստացված եկամուտներն ըստ տարիների:
Հիմնադրամի հավաքագրած միջոցների ընդհանուր ծավալը 2017-2025թթ. ընթացքում հասել է 222,9 միլիարդ դրամի: Միայն 2024թ. ընթացքում հավաքագրվել է 45,4 միլիարդ դրամ:
Ներկայում հիմնադրամի շահառուների թիվը հասնում է 5 484-ի: Նրանցից 4 555-ը զոհված զինծառայողների ընտանիքներ են, 248-ը՝ անհայտ բացակայող զինծառայողների հարազատներ, իսկ 681-ը՝ ֆունկցիոնալ սահմանափակումներ ունեցող զինծառայողների ընտանիքներ:
2020թ. արցախյան պատերազմից հետո հիմնադրամի հատկացումները կտրուկ աճել են: Եթե 2019թ. հատկացվել էր 822 մլն դրամ, ապա 2020թ. այս ցուցանիշը տասնապատկվել է՝ հասնելով 8 մլրդ դրամի: 2021թ. ևս գրանցվել է հատկացումների սրընթաց աճ՝ 44,4 մլրդ դրամ: 2022-2023թթ. հատկացումները համեմատաբար նվազել են՝ կազմելով համապատասխանաբար 16,8 և 14,7 մլրդ դրամ:
Ընթացիկ տարվա հունվարի հատկացումները կազմել են 1,5 միլիարդ դրամ, իսկ 2024-ին՝ 21,5 միլիարդ դրամ:
Ուշագրավ է, որ հիմնադրամի սեփական ակտիվների կառավարումից ստացված եկամուտները ևս աճի միտում են դրսևորել՝ 2021թ. 1,8 միլիարդ դրամից 2025թ. հասնելով 25,3 միլիարդ դրամի:
***
«Զինապահ» զինծառայողների ապահովագրության ազգային հիմնադրամը ստեղծվել է 2017-ին հայրենիքի սահմանները պաշտպանելիս զոհված կամ անհայտ բացակայող ճանաչված զինծառայողների ընտանիքներին և 1-ին ու 2-րդ խմբի զինհաշմանդամություն ձեռք բերած զինծառայողներին կայուն ֆինանսական հատուցումներ տրամադրելու նպատակով։
Պատմություններ
