Ադրբեջանը 1 մլն դոլար է հատկացրել Ուկրաինային մարդասիրական օգնություն ցուցաբերելու համար։ Համապատասխան հրամանագիրը ստորագրել է երկրի նախագահ Իլհամ Ալիևը, հայտնում է «Ազատություն» ռադիոկայանի ադրբեջանական ծառայությունը։
Ալիևի ստորագրած հրամանագրում ասվում է, որ հատկացված միջոցները կուղղվեն Ադրբեջանում արտադրված էլեկտրասարքավորումների ձեռք բերմանը և կուղարկվեն Ուկրաինա՝ որպես մարդասիրական օգնության:
Ադրբեջանն Ուկրաինային տրամադրել է շուրջ 40 մլն դոլարի աջակցություն
Նախկինում էլ Ադրբեջանը մարդասիրական օգնություն է ուղարկել Կիև։ 2023 թվականի հուլիսին Ալիևը 7,6 մլն դոլար էր հատկացրել երկրի էներգետիկայի նախարարությանը՝ Ուկրաինա էլեկտրական սարքավորումներ գնելու և առաքելու համար։
2022 թվականին Ադրբեջանն Ուկրաինային մարդասիրական օգնություն է տրամադրել ավելի քան 30 մլն մանաթի (17,6 մլն դոլարի) չափով։ Սա Բաքվի կողմից մեկ այլ երկրին հատկացված ամենամեծ աջակցությունն էր այդ տարի։ Բաքուն ուղարկել է դեղորայք, սնունդ, տրանսֆորմատորներ և գեներատորներ և ընդունել ուկրաինացի երեխաներին բժշկական և հոգեբանական վերականգնման համար։
Ուկրաինայի դեմ Ռուսաստանի սանձազերծած պատերազմի սկզբից ի վեր Ալիևը հայտարարել է, որ Բաքուն աջակցում է Ուկրաինայի տարածքային ամբողջականությանը։
«Ուկրաինայի պատերազմը մեծ ողբերգություն է երկու ժողովուրդների համար, որոնք շատ մոտ են միմյանց թե՛ էթնիկական, թե՛ կրոնական տեսանկյունից։ Սա մեծ ողբերգություն է»,- ասել էր պետության ղեկավարը։
Միաժամանակ, Բաքուն հրաժարվել է Կիևին զենք մատակարարել։ «Չնայած մեզ խնդրում են, մենք չենք կարող», – ասել է Ալիևը։
2024-ի տարեվերջի դրությամբ՝ Ադրբեջանը մոտ 40 մլն դոլարի աջակցություն է տրամադրել Ուկրաինային։
Պաշտոնական Մոսկվան բազմիցս հայտարարել է, որ անթույլատրելի է համարում ցանկացած օգնություն Ուկրաինային։
Լարվածություն՝ ինքնաթիռի կործանումից հետո
Վերջին շրջանում ռուս-ադրբեջանական հարաբերություններում որոշակի լարվածություն է առաջացել։ Ադրբեջանից Չեչնիա ուղևորվող մարդատար ինքնաթիռի կործանումից հետո Իլհամ Ալիևը հայտարարել է, որ ադրբեջանական ինքնաթիռի աղետի մեղավորը Ռուսաստանի ներկայացուցիչներն են, և ռուսական կողմը պետք է ներողություն խնդրի Ադրբեջանից։
Կործանված ինքնաթիռի շուրջ լարվածության ֆոնին ռուս-ադրբեջանական տարաձայնությունները սրվել են տեղեկատվական դաշտում։
Հունվարի 28-ին ՌԴ ԱԳՆ էր կանչվել Ադրբեջանի դեսպան Ռահման Մուստաֆաևը «ադրբեջանական ԶԼՄ-ներում մի շարք հակառուսական հրապարակումների, ինչպես նաև Բաքվում «Ռուսական տան» դեմ ապատեղեկատվության արշավի առնչությամբ»: Հաջորդ օրն էլ՝ հունվարի 29-ին, Ադրբեջանի ԱԳն էր հրավիրվել ՌԴ դեսպան Միխայիլ Եվդոկիմովը։ Դեսպանին փոխանցվել է, որ ռուսական մամուլում հրապարակումները, ինչպես նաև Ռուսաստանի որոշ պաշտոնական շրջանակների կողմից Ադրբեջանի դեմ ուղղված ապատեղեկատվական հաղորդագրությունների և ռեպորտաժների հրապարակումը թյուրիմացություն է առաջացնում և հակասում է երկու երկրների միջև դաշնակցային համագործակցության մասին հռչակագրի բովանդակությանը և ոգուն։
Ադրբեջանը փակեց «Ռոսսոտրուդնիչեստվո»-ն
Փետրվարի 6-ին ադրբեջանական Report-ը, վկայակոչելով իրազեկ աղբյուրներին, հայտնում է, որ ադրբեջանական կողմը դիվանագիտական ուղիներով Ռուսաստանին պաշտոնական ծանուցում է ուղարկել Ադրբեջանի Հանրապետության տարածքում «Ռոսսոտրուդնիչեստվո» գործակալության աշխատանքի դադարեցման մասին։ «Ռոսսոտրուդնիչեստվո» գործակալությունը առաջատար դեր ունի աշխարհում Ռուսաստանի մարդասիրական ազդեցության տարածման գործում։ Կազմակերպությունը ներկայացված է աշխարհի 71 երկրներում՝ «Ռուսասկան տուն» ոչ պաշտոնական անվան տակ։
Ադրբեջանը ծանուցում է ուղարկել նաև ԱՄՆ-ին՝ երկրում ԱՄՆ Միջազգային զարգացման գործակալության (USAID) գործունեությունը դադարեցնելու մասին։ Ադրբեջանի արտաքին գործերի նախարարության մամուլի ծառայության ղեկավար Այխան Հաջիզադեի խոսքով, Ադրբեջանը ծանուցման մեջ նշել է, որ ԱՄՆ ՄԶԳ-ն իրավական հիմք չունի երկրում գործելու համար, և որ այն պետք է դադարեցնի իր գործունեությունը:
Էլեն Մուրադյան
